Site icon The Aizawl Post

023- Oscar-a Indian lansarh ber kum

2023- Oscar-a Indian lansarh ber kum
Kumin chu Oscar-a Indian lansarh ber tum niin, ‘RRR’ film hla ‘Naatu Naatu’-in Best Original Song a dawng a, The Elephant Whisperers-in Best Documentary on Short Subject a dawng bawk. Hei bakah hian ‘Naatu Naatu’ hi Oscar stage-ah Rahul Sipligunj leh Kaala Bhairava ten an perform a, mipui lawm pawh an hlawh hle a ni. Anni bakah hian Bollywood star Deepika Padukone pawh Oscar stage-ah nalh zeih zawih taka inlanin, presenter a ni ve bawk.
Naatu Naatu avang hian MM Keeravani leh Chandrabose ten award hi dawngin, Indian hla, Telegu production Oscar dawng thei hmasa ber a nih bakah, Indian film siam zinga hla category-a award dawng thei hmasa ber a ni bawk. Naatu Naatu hian Golden Globe Award pawh a lo dawng tawh a, Oscar pawh hi dawng tura rinkai pawl a lo ni sa tawh bawk.
Oscar-ah hian ‘Slumdog Millionaire’ film hla ‘Jai Ho’ avangin AR Rahman-ah he category bakah Best Original Score award a lo dawng tawh bawk a, mahse, Slumdog Millionaire hi chu Indian film siam (Indian production) a ni lo. ‘Naatu Naatu’ hi Indian hla he category-a Oscar award dawng thei pahnihna niin, Telegu hlaah chuan a hmasa ber a ni.
Kartiki Gonsalves leh Guneet Monga te pawhin ‘The Elephant Whisperer’ avangin Best Documentary Short Film an dawng a, he Netflix documentary-ah hian Kartiki hi director niin, Guneet Monga hi producer a ni ve thung.
The Elephant Whisperer hi minute 41 a sei niin, sai note, a puiin a thih san, Raghu an tih leh a a enkawltu Bomman leh Bellie te inzawmna te tarlan a ni a, a ruka sapeltu te lak atanga Raghu an hum dan leh an enkawl puitlin dan te tarlan a ni. Gonsalves hi wildlife leh social documentary photographer, photo journalist leh cinematographer niin, tun hi film a direct vawi khatna a ni.
Deepika Padukone pawh a vawi khat nan Oscar red carpet-ah a inthehthil a, kawrfual dum leh velvet glove leh lunghlu thi nen, mit a la khawp mai. Deepika Padukone hian ‘Naatu Naatu’ perform tur a ko chhuak a, “A thunawn sak pui nuam chi, beat tang tha et awt bakah dance move pui lutuk mai nen he hla hi khawvelin a ngaihven lo thei lo. ‘RRR’ scene a lang a ni a, he movie hi a tak taka Indian zalenna sualtu thian dun, Alluri Sitarama Raju leh Komaram Bheem te inthian thatna chungchang tarlana ni. Telegu-a an sak mai bakah a film-ah hian anti-colonist theme tarlan a ni a, a hla ngaithlak tawh chuan a awm hle hle theih tlat loh bawk!
“YouTube leh TikTok-ah vawi maktaduai chuang en a hlawh tawh a. Cinema hall bakah khawvel hmun hrang hrangan laichhuat an chhir pui a, Indian film siam zinga hla Oscar-a nominate hmasa ber a ni bawk. Naatu hi inhre tawh em? In la hre lo a nih chuan tunah in hre tawh dawn e. RRR film atangin hei le Naatu Naatu chu le,” a ti a, Rahul Sipligunj leh Kaala Bhairava ten a hla an perform zui ta nghal a ni.

Exit mobile version