Pathianni zan khan Euro 2024 khel tur zawnna khelh chhun-zawm a ni a, inelna lian hma-chhawn tura tling chiang tawh Portugal chuan si hnih faiin Iceland an hneh a, inkhel vawi 10 an hmachhawnah an chak vek a, record tha tak nei chungin an tlang.
Portugal hian Estádio José Alvalade, Lisbon-a an mikhual Iceland lakah an khel tha viau a, Manchester United captain Bruno Fernandes chuan minute 37-naah hmahruaina goal a thun. Fernandes goal thun hmanga chawlhlawk an hma an hruai hnuin minute 66-naah Ricardo Horta chuan an goal hnihna a thun belh a. Hun tawp thlengin goal dang a luh belh tawh lo.
Portugal hian Group J-ah 2 Slovakia, Luxembourg, Iceland, Bosnia & Herzegovina leh Liechtenstein te awmpuiin an khingpuite hi an hneh vek a. Inkhel vawi 10 an hmachhawn atangin goal 36 zet an thun a, goal hnih chauh an chhuah thung. Euro 2024 khel tur zawnnaa an chetthat em vangin Germany-a inelna lianah champion tura rinkai an nih phah ngei ang. Euro 2024 khel tur zawnnaah hian Portugal bakah France chu chak vek awmchhun an ni mek a. France hian chak vek chung a tawp khar turin zanina an khingpui Greece an hneh a ngai dawn thung.
Group J atang hian Slovakia in Portugal hnungzuiin inelna lian hmachhawn turin an tling a, pathumnaa awm Luxembourg in playoff an khel zui ang. Group ah pahnihna ni chiang tawh Slovakia chuan pathianni zan khan 2-1 in Bosnia an hneh a. Luxembourg chuan table mawngphah a awm Liechtenstein chu si khat faiin an hneh ve bawk.
Pathianni zana inkhel dangah Group A atanga tlang chiang tawh Scotland chuan Norway an hmachhawn a, inkhel hmuh-nawm takah 3-3 in an inhneh-tawk. Hampden Park-a lenglut Norway in bul an tan tha viau a, minute thumna lekah Aron Don-num chuan hmahruaina goal a thun nghal. Goal thun hma viau mah se Scotland in goal thum ngawtin an chhang let a. Goal thum ve ve thunin an intha then thei ta hram a ni.
100% chak chunga tlang Portugal
