Daily Newspaper

1966 hrechiang turin BJP Mz president-in Union HM ngen

14

Kum 1966-a Mizoram a buai chhan chu hetihlaia Assam chief minister-in diriam leh tham lo taka Mizoram leh a hruaitute a tih vang a ni tih theihnghilh lo turin BJP Mizoram president Vanlalhmuaka chuan Union Home minister Amit Shah a ngen.

BJP Mizoram Pradesh president hian July 28 khan Union Home minister Amit Shah hnenah Assam-Mizoram ramria buaina chungchangah lehkha a thawn a, Union Home Minister Office pawhin a lo dawng tih a hrilhhriat a ni.

A lehkhaah hian, Prime minister Narendra Modi kaihhruaina hnuaia India ram leh hmarchhak state-te tana hmalakna chu BJP Mizoram chuan a chhuangin lawmawm a tih thu te; India leh NE state tana an thawh zel na turah BJP Mizoram chuan a thlawp thu te a hrilh rualin, 2021 July 26-a Vairengte khuaa Assam leh Mizoram buaina avanga nunna an chan leh hliam an awm chu pawi a tih thu leh a tawrhpui thu a hrilh. ‘Hetiang thil duhawmlo hi a thlen leh tawh ngailohna turin, hnam nunzia leh ram leilung en chunga Assam-Mizoram inrina hi a rang thei ang bera ralmuang taka chinfel sak thuai turin a ngen tih a sawi.

Mizoram leh hmarchhak state thenkhatte Covid 19 hrilengin nasa taka a tihbuai lai leh, state mipui leh sawrkar pawhin dam khawchhuahna buaipui a, thildang reng reng buaipui hleithei loa, hrehawm leh beidawng taka an awm lai a, Assam – Mizoram inrinaah status quo vawng tura tihna hmun vela Assam sawrkarin armed police force tir a, Mizo thenkhatte huanthlai tichhe zawng leh remna leh muanna awm mek tichhe zawnga hma an rawn la chu pawi a tih thu a thlen. ‘Hetiang hi India rama state ralmuang berah a thlen leh tawh lohna turin a hnu leh awm tawh lo tura min chinfel sak turin ka ngen a che,’ a ti.

July 27-a Assam chief minister-in thuthar thehdarhtute hmaah Assam-Mizoram inrinaah commando 4000 an dah tur thu a sawi chu a pawi a tiin, rilru thianghlim leh dan zawm tha khua leh tuite a barakhaih takzet tih BJP Mizoram president hian Union Home minister hi a hrilh.

‘Kum 1966-a Mizoram buaina lo chhuahna bul kha uluk taka i chhuikir chuan, Mizo district-a mautam avanga Mizo mipuiten tam namenlo an tawrh laiin, khatihlaia Assam Congress chief minister-in Mizote thamlo tak leh diriam taka a tih avanga lo chhuak a ni tih kha i theihnghilh loh ka duh a. One India, Strong India – din tura Prime minister Modi hoa ke kan pen chhoh mek lai a, Assam chief minister-in Mizoram state, Indian Union zinga pakhat chu, China emaw Pakistan emaw bei tur ni awm taka commando 4000 ka din anga, Assam – Mizoram state inrinaah ka dah ang, a tih hian, BJP chief minister tawngka tur ni theiah ka ngailo mai niloin, a zahthlak ka ti takzet a. Heta a statement avanga India hmarchhakah leh a bikin Mizoramah thil duhawm lo zawk a thlenlohna tura hma la thuai turin ka ngen che a ni,’ a ti.

Prime minister Narendra Modi kaihhruaina hnuaiah India mipuite “Sabke Sath, Sabke Vikas and Sabke Viswas,” national highway-a kan kal mup mup a, khawvelin min thlir thup laia, NE state ramri buai avanga India ram hmelhem tur hi BJP Mizoram Pradesh chuan a phal lo, tih Vanlalhmuaka hian Amit Shah hi hrilhin, ‘Kan duh ngai dawn lo ani tih hrilh chung che in, a rang lama chinfel ngei duhin, he lehkha hi ka rawn ziak a ni,’ a ti.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy