Site icon The Aizawl Post

1st MAP Ground phullem phah hawng

Cheng nuai 1300 chuang siam zawh 1st Bn. MAP Ground-a phullem phah leh gallery siam belh chu Nilaini khan chief minister Zoramthanga’n a hawng.
Armed Veng-a awm he ground-a synthetic football turf siamna atan hian 2019 November 25 khan Ministry of Youth Affairs & Sports kaltlanga Khelo India Scheme atangin nuai 500 hmuh a ni. Tender chhuah nghal niin, hna thawk tur hian Décor India- Complete Sports Solution Guwahati thlan a ni. 2020 February 26 ah work order pek a ni a, Covid-19 leng avangin ruahman anga thawh chak theih a nih loh bakah a field area tih zauhna turin field thlang lam RCC extension tih hmasak a ni a, he hna thawk tur hian tender chhuah a nih hnu ah M/s Creative Minds, Chanmari West Aizawl thlan niin, hemi atan hian SEDP atangin cheng nuai 425 leh Khelo India Scheme atangin nuai 450 hmuh a ni. Grass phahna leh RCC extension atana sum hmuh belhkhawm hi a vaiin nuai 1375 a ni. Grass phah hnathawh theih a nih velah chak taka thawh nghal niin, kumin February 28 khan phah fel a ni.
Chief minister chuan football ground changtlung tak bakah hmundanga la neih ngai loh gallery hnuailama in lian tha tak tangkai taka hman theih a ni chu lawmawm a tih thu a sawi a. Mizorama sports infrastructure entawntlak ber zing ami nia a hriat thu a sawi.
Sports minister chuan 1st Bn. MAP Ground tihchangtlun chungchangah sports department leh police ten thawhhona tha tak nen a an hma lakna avangin tun hun hi a thleng ta tih sawiin, ground neitu police lamin inhawng taka midang hman theiha ruahman a ni chu lawmawm a tih thu a sawi.

Exit mobile version