2014 atangin India-China ramri kân ru man awm lo
Kum 2014 atangin India-China ramri kâna India-a lut ru tumah an awm lo tih sorkarin parliament-ah a sawi a, Pakistan, Bangladesh, Myanmar, Nepal leh Bhutan nena inrinaa lut ru erawh venhim hna thawktuten hetih hun chhung vek hian mi 23,926 an man.
Lok Sabha rorel inkhawm kal meka sorkarin a chhinchhiahna a pharhah India-Bangladesh ramri kân ru man an tam ber a, Myanmar, Pakistan leh Nepal-Bhutan ten an dawt.
Kum 2014 atanga kum tina ramri kân ru zat chhinchhiahnaah chuan India khawthlang lam leh hmarchhakah a tam ber a, hmar lama China nena inrina erawh tumah lut an awm lo a ni.
Union State Home Minister Nityanand Rai-a’n Trinamool Congress MP pahnih, Jagdish Chandra Barma Basunia leh Sharmila Sarkar te zawhna a chhannaah kum 2014 leh 2024 inkarah Bangladesh, Myanmar, Pakistan leh Nepal-Bhutan nena India inrina kân ru man 20,806 an awm a. Kuminah November thla tawp thleng khan 3,120 man an ni tawh bawk tih a tar lang.
India-Bangladesh ramriah man tam berin mi 18,851 an ni a. India-Myanmar ramriah 1,165, India-Pakistan ramriah 556 leh India-Nepal-Bhutan ramriah 234 man an ni bawk.
Kumin chhung bikah India-Bangladesh ramriah mi 2,556, India-Myanmar ramriah 437, India-Pakistan ramriah 49 leh India-Nepal-Bhutan ramriah 78 man an ni a. Minister-in a chhannaah hian India-China ramriah man an awm loh avang hian India hmar lam ramri chu venhimna a khauh tha tawk hle tih a lang niin a sawi.
2014 atangin India-China ramri kân ru man awm lo
