2019 hnuah Murray champ leh
Kum li dawn lai tro-phy a chawi tawh loh hnuah Pathianni khan Briton Andy Murray chuan Aix-en-Provence lama ATP Challenger event final-ah 2-6 6-1 6-2-a American top seed Tommy Paul hneh chungin trophy lawm tur a nei ve leh ta hram.
Kum 35 mi ni ve tawh Murra hi tum thum lai Grand Slam champion ni ve tawh mah se hliam leh harsatna neuh neuhin a tlakbuak ve reng avangin a dinhmun a tlahniam thui ta viau a, Pathianni hnehna kha kum 2019 Antwerp khaw hlawhtlinna hnu lama title a lak leh vawikhatna niin, clay leilung bikah phei chuan kum 2016 Rome hnua a hmasaber a ni nghe nghe.
ATP Challenger title kha kum 2005 hnu lama second-tier Challenger level title a sualchhuah vawikhatna a ni nghal bawk.
Fifth seed Murray hi French Open atana inbuatsaih ve mek a ni a, April thla khan Monte Carlo leh Madrid lamah first round paltlang zo loin a tla a; tuntumah hian wildcard entry hmangin a tel a, kumin Australian Open semi-finalist kum 25 mi hnehin a lawm zen zen tawh loh trophy a sualchhuak.
Pathianni hnehna avangin nimina ATP ranking thar tarchhuahah Murray hian world number 42-na a luah chho ve ta a, May 2018 hnu lama world ranking-a a la san ber tum a ni a; world number 17 Paul a hneh kha kumina top-20 player a hneh vawithum-na ni tawhin, January thla Australian Open-ah Matteo Berrettini a hneh a, February thla Doha khaw tournament lianah Alexander Zverev a tukzal bawk.
Kum khat chhunga grand slam tournament pahnihna tur French Open-a inlan ngei tuma inbuatsaih mek Murray hian hma a rawn sawn chho ve leh mek a ni.
2019 hnuah Murray champ leh
![](https://theaizawlpost.org/wp-content/uploads/2023/05/murray.jpg)