Daily Newspaper

2020-21 La Liga kal lai bihchianna

10

Spanish Primera Liga season kal mek hi sponsorship avangin LaLiga Santander tih a ni a, league khelh tan a nih atangin kum kal lai hi a season 90-na chiah niin, tun dinhmunah a khel tam berin he thu buatsaih lai thleng hian game 13 an khel tling tawh a, an dinhmun tlangpui kan thlirho dawn a ni.

Hripuiin season liamta nasa taka a tihbuai avang leh a huna season zawh hman a nih loh avangin 2020-21 La Liga hi tun September ni 12 khan an tan thei chauh a, ruahman lawk ang chuan nakum May ni 23-a zawh fel tur a ni a; Europe lamah chuan Covid-19 vaccine semchhuah tan a nih thuak thuak tawh avangin Spanish top flight season kal lai hi kum liamta anga sukuk chiam tawh lo turah ngai phawt ang.

Relegation leh promotion
Kan hriat angin, Europe league lian zual panga zinga pakhat La Liga hi team 20-in an khel a, chu’ng zinga team 17 chu kum 2019-20 season-a inhamtangte niin, club dang pathumte chu top flight hnuai chiah 201-20 Segunda División atanga kaisang chho an ni a, hetah hian Segunda División atanga a sang pahnih an tlang nghal a, team khat dang chu play-offs kaltlanga La Liga khel an ni.

Season liamtaah khan Segunda Division lama tlahniam chiang hmasaber chu Espanyol niin, kumin July ni 8 khan Derbi Barceloní an tih mai, Barcelona nena an intumah sikhat faia an tlawm avangin kum 26 zet top tier-a an lo khawsak tawhna a tawp fel ta rih a ni.

La Liga atanga division hniam zawka tlathla pahnihna chu Mallorca niin, kumin July ni 16-a an mikhual Granada laka 1-2-a an tlawm rual khan second division-ah an kirleh nghal a ni.

Season liamtaa team ‘relagate’ hnuhnungber leh a pathumna ni bawk Leganés chu kumin July ni 19 khan an tla a, chak an mamawhna inkhel leh season liamtaa an game hnuhnungber ni bawkah 2-2-in Real Madrid an inhnehtawkpui a, an inhamtang zo ta lo a, first tier-a kumli an khawsak hnuah division hniam zawk an pan leh ta a ni.

Segunda Division atanga kaichhote
July ni 12, 2020 khan Cádiz chuan season thar (tun season kal mek)-a top flight khel turin an dinhmun an tifel hmasaber a, Zaragoza laka Oviedo-in 4-2 hnehna an chan rualin kum 14 lai an kalbosan La Liga kawtkaiah an chuangchhuak ve leh ta hlawl a ni.

Promotion hmu pahnihna chu Huesca niin, kumin July ni 17 inkhel pakhata sithum faia Numancia an hneh rual khan season khat lek second division lama an khawsak hnuin first division-ah an kirleh nghal a ni.

Kai chho pathumna chu play-off winners Elche niin, Girona nena vawihnih khelh belhkhawmah 1-0 hnehna an chang a, kumnga an kalbo hnuin top flight an chuangchhuak leh ta a ni.

Top 10 team thlurbingna
Tun dinhmunah a khel tam berin league game 13 an khel tawh a, match 11 leh 12 khel an awm bawk a, hmahruaitu ni mek Real Sociedad chuan khelh 13-ah point 26 hmuin hma an hruai mek a, chik zawkin a sang zual 10-te hi thlirzui teh ang.

1. Real Sociedad
An team hmingpum chu Real Sociedad de Fútbol S.A.D tih niin, hming lem (nickname)-ah Txuri-urdinak (The Whites and Blues) tih te, Erreala/La Real (The Royal) tih an ni bawk.

Club upa tawh tak niin, kum 111 kalta, kum 1909 September ni 7 khan din a ni a, an home ground Anoeta Stadium chu mipui 39,500 leng a ni.

An president hna chelh lai chu Jokin Aperribay niin, head coach Imanol Alguacil an ruai mek a, 2019-20 La Liga kha parukna niin an hmangliam.

Sociedad hian league game 13-ah vawisarih hnehna chang tawhin, draw vawinga an nei a, chak loh vawikhat chiah la neiin, goal 23 an thun tawh a, an lamah goal ruk chiah la lutin, tlarhnung ven lamah fak an hlawh hle rih.

2. Atlético Madrid
Table-a pahnihna luahtu Madrid club lian pahnih zinga a te zawk hian khelh 11-a point 26 bawk neiin hmahruaitu team nen an point hmuh inang mah se hma an hruai zo rih lo a, game hnih laia khel tlem zawk an nih avang erawh chuan hmahruai theihna hun remchang tak an nei meka ngaih a ni.

An team hmingpum chu Club Atlético de Madrid niin, hminglem an ngah hle a, chu’ngte chu – Los Colchoneros (The Mattress Makers), Los Rojiblancos (The Red and Whites), Los Indios (The Indians) leh El Pupas (The Jinxed Ones) tihte a ni a, a lamtawiin ATM tih an ni bawk.

He club pawh hi kum 100 chuang duai ni tawhin, kum 1903 April ni 26-a din tan a ni a, an din tirha a hming an puttir chu Athletic Club Sucursal de Madrid tih a ni nghe nghe.

An ground Wanda Metropolitano Stadium-ah mipui 68,456 an leng mek a, club neitu lawk ber Miguel Ángel Gil Marín chuan chanpual 51% a nei a, 30% neitu Idan Ofer leh 19% neitu Enrique Cerezo an awm bawk.

An club president chu Enrique Cerezo niin, head coach atan Diego Simeone an ruai mek a; season liamta khan La Liga table-ah pathumna an ni.

Season kal mekah khelh 11-a point 26 hmuin pahnihna an luah mek a; vawiriat chak tawhin, draw vawihnih an nei a, tlawm vawikhat chiah la neiin, goal 21 an tilut tawh a, goal li chiah an la chhuah thung.

3. Real Madrid
Beisei anga season bul tan fuh lo Spanish giants hian nizan, tukin zing lam tawhah khan Athletic Bilbao an mikhual a, chumi result tarlan hman a nih loh avangin he thu buatsaih lai thlenga league-a an dinhmun hi dahchhuak ta mai ila.

League game 12 atanga point 23 hmuin table-ah pathumna an luah mek a; vawisarih an chak tawh laiin vawithum ngawt an tlawm tling der tawh a, draw vawihnih an nei tawh.

Heti zat game atang hian goal 19 thunin, goal 12 an chhuah tling a, hliamin a tihbuai ve reng avangin an tlarhnung hian duhthu a sam lo mek a; nizan result tarlan hman loh azirin table-a an dinna hi a danglam thei dawn a ni.

Khawvela football club lian leh hlawhtlingberte zinga pakhat Real Madrid hi kum 118 zeta upa ni tawhin, March ni 6, 1902 khan Madrid Football Club tih hming pua din a ni a, tuna a hmingpum chu Real Madrid Club de Fútbol tih a ni.

He team pawh hian kohduatna a ngah hle a, chu’ngte chu – Los Blancos (The Whites), Los Merengues (The Meringues), Los Vikingos (The Vikings) leh La Casa Blanca (The White House) tihte a ni hlawm.

An khelmual ropui Estadio Santiago Bernabéu an tihah chuan mipui 81,044 zet an leng a, tunlai hian cheithat mek niin, an khelmual pakhat zawk Estadio Alfredo Di Stéfano an tihah chuan home match pawh an khel rih a, he stadium hi chu an training ground ni pahin, inkhel entute tan pawh thutna 6,000 chauh dah a ni.

An president tang lai chu Florentino Pérez niin, an head coach rawih lai chu an player ropui ni thin Zinedine Zidane ngei kha a ni.

Season liamta khan La Liga champion an ni a, tarlan tak angin, 2020-21 season kal mekah hian beisei angin bul an tan fuh thei lo a, Europe lamah pawh a vawikhatna atana Champions League group stage pel zo lo thei mai dinhmunah an ding hman ren rawn a, mahse, Europe club inelna sang berah chuan group hmahruaitu ni chungin last 16 an lut a, La Liga lamah pawh hmalam panin an pen leh mek tawh a ni.

4. Villarreal
Table-a palina luah mektute hian league khelh 13-ah vawinga lek hnehna an la chang a, goal 16 an tihluh tawh laiin goal 12 an chhuah tling tawh thung a, vawikhat chiah tlawm la nei mah se draw tum sarih ngawt an neih tawh avangin top four-ah an inhamtang hram hram a ni ber.

He team hian din kum pahnih a nei a, kum 1923 March ni 10 khan Club Deportivo Villarreal tiin an din zet a, chumi atang chuan tun hi a kum 97-na ni tawhin, kum 1947 August ni 25 khan dinthar leh ngaiin a awm a, chumi tum chuan Club Atlético Foghetecaz tiin an dinthar leh a, chumi atang chuan a kum 73-na hmang mekin, tunah hian a hmingpum chu Villarreal Club de Fútbol tih a ni.

Nickname a larpui chu El Submarino Amarillo (The Yellow Submarine) tih niin, an home ground Estadio de la Cerámica chu mipui 23,500 lenna a ni a; club neitu Fernando Roig chu club president ni nghalin, Unai Emery chu head coach a ni a, pangna ni chungin season liamta kha an khar.

Kan tarlan tak team palite hi La Liga kaltlanga Champions League group stage khel thei dinhmuna ding mekte an ni a, season tawp hunah top four hi an luah kim vek thei dawn em a chiang rih lo.

5. Sevilla
Table-a pangana luah mektu Sevilla hian khelh 11 atangin point 19 an rut ve tawh a, goal 13 an thun tawh laiin goal kua chiah an la chhuah a, Europa League group stage khel pha dinhmuna ding mek an ni.

He team hi a hmingpum chu Sevilla Fútbol Club tih niin, nickname pahnih Los Nervionenses leh Los Palanganas a nei a, club hming lamtawiin ‘SFC’ tia sawi leh ziah thin an ni bawk.

Club upa tawh tak niin, kum 1890 January ni 25 daih tawh khan Sevilla Football Club tia din a ni a, a kum 130-na a hmang mek.

An khelmual Estadio Ramón Sánchez Pizjuán chu mipui 43,883 lenna niin, club neitu Sevillistas de Nervion awpna hnuaiah club president chu José Castro Carmona a ni a, an head coach hna chelh mektu chu Julen Lopetegui niin, season liamta khan palina ni chungin La Liga an khar.

6. Granada
Parukna ni chunga Europa Conference League play-off round khel thei dinhmuna ding mek Granada hian season kal mekah match 12 atangin vawinga hnehna an chang tawh a, draw vawithum neiin, vawili an tlawm tling tawh a, point 18 an hum mek. Goal 15 an thun tawh laiin goal 20 an chhuah tling tawh.

Granada Club de Fútbol tih hmingputu Granada hi Nazaríes (Nasrids), El Graná, Matagigantes leh Rojiblancos ti tea kohduat hlawh a ni a, kum 1931 April ni 14 khan Club Recreativo Granada tih hming puin an din a, a kum 89-na a hmang mek.

An home ground Nuevo Los Cármenes Stadium-ah thutna 19,336 awmin, club neitu chu Desports a ni a; president Rentao Yi hnuaiah head coach Diego Martínez-a hoin season an tan tha thawkhat a, pasarihna ni chunga season hmangliam thei team hian tunah parukna an luah mek a, tun dinhmunah season kalta aiin pen khatin hma an sawn mek a ni.

7. Cádiz
Segunda División atanga kai chho Cádiz Club de Fútbol tan top flight league game 10 chuang khelh hnua top 10 luah phak hi beisei piahlam a tih theih awm e.

Heti zat game atang hian an tlawm leh chak a inzat chiah a, vawinga chak, vawili tlawm niin, draw vawithum an nei tawh bawk. An goal thun tawh zat hi 11 a nih laiin goal 17 an chhuah tling tawh thung.

Villarreal ang bawkin El Submarino Amarillo (The Yellow Submarine) tia kohduat hlawh team an ni a; kum 1910 September ni 10-a din a nih laia a hming chu Cádiz Foot-ball Club tih a ni.

An khelmual Ramón de Carranza-ah mipui 20,724 an leng a; president Manuel Vizcaíno leh head coach Álvaro Cervera-te’n team an kaihruai mek a ni.

8. Barcelona
Zanin kar laihawl league inkhel awmchhuna hmahruaitu Real Sociedad mikhual tur Barca hian he thu buatsaih lai thlengin khelh 11-ah vawinga hnehna an chang tawh a, vawili tehreng tlawm tling tawhin, draw pawh vawihnih an nei tawh a, point 17 nen pariatna dinhmun an luah pha hram a, Sociedad laka an chak chuan an hmaa awm pathum Cadiz, Granada leh Sevilla hmakhalhin table-ah pangana an luah chho dawrh thei dawn a, chuti a nih chuan an aia khelh khata la khel tam cheu tur hmahruaitu Real Sociedad nen hian point ruk chauhin an inthlau tawh ang.

Catalan team hian league season kal mekah goal 21 tilut tling tawhin, goal 11 an chhuah thung.

Spanish club ropui hi a hmingpum chu Futbol Club Barcelona tih niin, lamtawia FCB tih an ni a; kohduatna’n Barca, Blaugrana (team), Culés, Barcelonistas (supporters), Blaugranes leh Azulgranas (supporters) tihte a larpui.

FCB hi kum 1899 November ni 29 khan Foot-Ball Club Barcelona tih hmingpua din niin, a kum 121-na a hmang mek a ni.

An khelmual hmingthang Camp Nou-ah mipui 99,354 tehreng an leng a; an president tanglaiin hmingchhe taka ban tawh a duh loh avangin kan hnung lawk khan a ma thuin banna a thehlut a, tunah hian kumthar inthlan hma atan Carles Tusquets chuan president hna a lo chelh lailawk a ni.

Head coach atan Dutch coach hriat hlawh Ronald Koeman an ruai mek a, 2019-20 season-ah khan La Liga lamah pahnihna an ni.

9. Celta Vigo
Game 13-a point 16 neitu Celta hian league kal laiah vawili hnehna changin, draw vawili bawk an nei tawh a, vawinga an chak lo tling tawh. Heti zat game-ah hian goal 17 an tihluh tlin tawh laiin goal 20 an chhuah tawh thung.

An full name chu Real Club Celta de Vigo tih a nih laiin an nickname chu Célticos (The Celts/Celtics), Celestes (The Sky Blues) leh O Celtiña (The Lovely/Little Celta) tihte a ni.

Kum 97 kalta 1923 August ni 23 khan din a ni a; an khelmual hman thiam Balaídos chu inkhel entu mipui 29,000 lenna a ni.

Club neitu Carlos Mouriño chu president a ni nghal a, an head coach chu Eduardo Coudet niin, season liamta kha La Liga lamah 17-na ni chungin an thlahliam.

10. Real Betis
La Liga season kal meka point hmu sang 10 zinga a hnuai ber luahtu hian pakuana Celta Vigo ang bawkin khelh 13-ah point 16 an hlawhchhuak tling a, vawinga an chak laiin vawisarih ngawt an tlawm tling a, draw vawikhat an nei tawh bawk.

Table-a 15-na luah chunga season liamta hmangliam pha team hi an hmingpum chu Real Betis Balompie tih a ni a, nickname hi an ngah phian a, Los Verdiblancos (The Green-and-Whites), Verderones (Big Green), Béticos
Heliopolitanos (Heliopolitans), Lobos (Wolves) leh El Glorioso (The Glorious) tihte niin, a lamtawiin RBB emaw Betis emaw tia koh lam ziah thin an ni.

Kum 113 kalta 1907 September ni 12 khan Sevilla Balompié tih hmingpua din niin, an home ground Estadio Benito Villamarín chu mipui 60,720 lenna a ni.

An president chu Ángel Haro niin, head coach hriat hlawh Manuel Pellegrini chuan a ho mek.

League khaikhawmna
Tukin zing lam result pakhat chhiar tel lohin he thu buatsaih lai thleng hian 2020-21 La Liga season kal mekah match 123 khelh tawh niin, goal 291 a lut tling tawh a, chu chu game tina goal 2.37 lut ziah ang a ni.

Top goalscorer ni mek pahnih RC Celta de Vigo striker Iago Aspas leh Real Sociedad forward Mikel Oyarzabal-te chuan goal sarih ve ve an nei tawh.

Home match-a chak chiangber ni mek Atlético Madrid chuan 27 September 2020 khan 6-1 tehrengin an mikhual Granada an sawp a; away-a chak chiangber Real Sociedad chuan 1 November 2020 khan 4-1-in mualneitu Celta Vigo an sawp ve bawk.

Season kal lai game khata goal luh tamber tum chu Granada laka Atlético Madrid-in 6-1 hehna an chang kha niin, 7 November 2020 khan Barcelona chuan 5-2-in Real Betis an hneh ve bawk.

Chak zawn rei ber Atlético Madrid chu vawisarih an chak zawn tling a; Atleti hi Villarreal nen tlawm nei loa kal tluang rei ber ni nghalin, game 10 chhung tlawm an nei lo tling.

Chak nei loa kal zawn reiber Huesca chuan match 12 chhungin hneh an nei miah lo a; vawithum theuh chak lo zawn chunga tlawm zawn reiber club pariat awmin, chu’ngte chu – Celta Vigo, Granada, Eibar, Levante, Osasuna, Real Betis, Sevilla leh Valencia-te an ni.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy