Daily Newspaper

2020 MTV VMA nomination-ah Ariana Grande leh Lady Gaga an langsar

6

MTV chuan 2020 MTV Video Music Awards nominations an puang ta a, Ariana Grande leh Lady Gaga an langsar ber a, nomination pakua ve ve an nei. Grande leh Gaga hi an zaidunna ‘Rain on Me’ avangin award ngaihhlut Video of the Year-ah pawh an lang dun nghe nghe a ni.

Lady Gaga hi award ngaihhlut pathum- Video of the Year, Artist of the Year leh Song of the Year-ah nominate a ni. Gaga chuan kumin nomination-ah a lawmthu sawiin Twitter-ah, “Tunlai khawvelin hun khirh tak mai kan hmachhawn laia hetiang khawpa ka vannei hi ka lawm hle a ni. Tunah hi chuan mitin mai hi award atana nominate vek mai tur kan ni- Kan huaisenna leh paukhauhna avangin. Lalpan malsawm che u rawh se, vawiina in thil min tihsak avang hian ka lawm e,” a ti

MTV VMA-ah hian tleirawl Billie Eilish pawh a langsar hle a, The Weeknd nen nomination paruk ve ve neiin, Grande leh Gaga an dawt a ni.

Kumin hian category thar pahnih an belh a, kan khawvel hun tawng mil turin ‘best music video from home’ leh ‘best quarantine performance’ category an siam thar a ni. MTV VMA hi category 15 an siam a, heng category hrang hranga award dawng tur hi fans vote hmanga thlan a ni dawn a, tunah hian vote thlak theih tawh a ni a, August ni 23 thleng voting an hawng dawn a, PUSH best new artist category bikah chuan August ni 30 thlengin a vote theih ang.

Kumin VMA nomination-ah hian record siam an awm nual a, Billie Eilish chu VMA history-ah kum 20 tlin hmaa video of the year category-a video pahnih nei thei hmasa ber a ni. Eilish kum 18 hi kuminah ‘everything I wanted’ avangin he category-ah hian nominate a ni a, nikum khan ‘Bad Guy’ avangin he category-ah hian nominate a lo ni tawh bawk.

Eminem ‘Godzilla’ featuring Juice WRLD chu video of the year-ah nominate a ni a, he category-ah hian Eminem hi tum riat nomination-a a lanna a ni ta a, zaithiam zingah he category-a nomination-a lang ngun ber a la ni.

Drake pawh Future-a feature-na ‘Life Is Good’ chu video of the year-ah nominate a ni a, Drake hian Rihanna leh U2 nih rualin, US-a piang ni lo zingah he category-a nominate ngun ber niin, tum li theuh nominate an ni tawh.

MTV chuan kuminah best dance video category an paih a, chutih rualin an tun hmaa awm thin an paih tawh best alternative video chu an dah thar leh a, new artist category pahnih chu pakhatah siamin PUSH artist of the Year an ti ta a, hei bakah hian category thar best music video from home leh best qurantine performance an telh thar ta bawk a ni.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy