Kum 2023- 2024 chhung hian Lawngtlai district-ah naupang kum 5 hnuailam thi 23 awmin, an zinga 20 chu nausen kum 1 hnuailam an ni.
District Level Committee on Child Death Review (CDR) leh Maternal Death Review (MDR) Lawngtlai chu an chairman, district bawrhsap Cheemala Siva Gopal Reddy hoin Nilaini khan an thukhawm a. Kum 2023- 2024 chhunga an district-a naupang thihna leh nau chunga nu thihna thlen dan thlir hoin, chutiang thihna a thlen loh nana hmalak dan tur an sawi.
District deputy chief medical officer Dr S Thaizi sawi danin, kum 2023- 2024 chhung hian Lawngtlai district-ah naupang kum 5 hnuailam thi 23 awmin, an zinga 20 chu nausen kum 1 hnuailam an ni a. Hemi chhung hian nau chunga nu thihna tum 5 a thleng bawk.
Heng thihna hi vanduaina vang a nih piahlamah, thenkhat chu an dam loh veleha damdawi in panpui thuai loh vang, damdawi in panna kawnga harsatna awm vang, duhthusama damdawi in changtlun tawk loh vang, nau pai laia inenkawl that tawk loh vangte nia a lan thu sawi a ni. Heng harsatna avanga thihna a thlen tawh loh nan nu leh paten fate damlo a ranglama damdawi in panpui nachang hriat, nau pai laia inenkawl that leh damdawi in ngeia nau neih, thawktu leh hmanruaah Lawngtlai district tihchangtlun lehzual a pawimawh thu te sawi niin, hriselna kawnga an district-in hma a sawn theihna tur rawtna leh hmalakna tur sawi ho a ni.
2023- 2024 ah Lawngtlaiah kum 1 hnuailam thi 20 awm
