2023 MTV Video Music Awards nomination an puang a, Taylor Swift-i’n nomination pariat neiin a langsar ber a, SZA-i’n nomination paruk neiin a dawt a, Doja Cat, Kim Petras, Miley Cyrus, Nicki Minaj, Olivia Rodrigo leh Sam Smith ten nomination panga theuh an nei a, BLACKPINK, Diddy leh Shakira ten pali theuh an nei bawk.
Award ngaihhlut ber Video of the Year category-a nominee pasarih zinga paruk chu hmeichhia an ni a, nikum khan he category-ah hian Taylor Swift-i’n ‘All Too Well’ avangin award a dawng a, kuminah pawh ‘Anti-Hero’ music video chu he category-ah hian nominate a ni leh a, Swift hi award dawng leh tura rinkai a ni. He category-a hmeichhia ni lo lang awm chhun chu Sam Smith leh Kim Petras ‘Unholy’ a ni a, anni pahnih pawh hi an pâ lo dun viau mai a, Sam Smith hi gay niin, Kim Petras pawh hi transgender a ni.
Kumin VMA-ah hian 2017 atanga category an telh thar artist of the year nominee zawng zawng chu hmeichhia vek- Beyoncé, Doja, Karol G, Minaj, Shakira leh Swift te an ni a, Doja Cat leh Karol G te hi Latin music atanga nominate niin, he category nomination-a Latin artist pakhat aia tam an lan vawi khatna a ni. Nikum kha he category-ah hian a vawi khat nan Latin artist nominate a niin, Bad Bunny chuan award a dawng zui ta bawk a ni.
Taylor Swift hi artist of the year category baka category danga a lanna zawng zawng chu a music video ‘Anti-Hero’ avanga a lanna vek niin, video of the year, song of the year, best pop, best direction, best cinematography, best visual effects leh best editing-ah te a lang.
Nomination a langsar ber dawttu SZA pawhin nomination paruk a neih zinga panga chu ‘Kill Bill’ avanga a neih niin- video of the year, song of the year, best direction, best art direction leh best editing-ah te a lang a, SZA hi ‘Shirt’ avangin best R&B-ah a lang tel bawk.
Kumin VMA nominee-ah hian vawi khat lanna 35 an awm a, hei hi VMA record niin, he award nomination-a vawi khat lanna an tam ber tum a ni a, chung zingah chuan Kim Petras (5), Metro Boomin leh Rema (3 ve ve), Ayra Starr, GloRilla, Ice Spice, Peso Pluma, Renee Rapp leh Yung Miami (2 theuh) te pawh an tel.
Kumin VMA-ah hian category telh thar an nei a, chu chu ‘best Afrobeats’ a ni a, tun kum zabi thara VMA-a genre bik category an belh pathumna a ni a, 2006 khan Latin leh 2019-ah K-Pop genre an lo telh thar tawh a ni. VMA-ah hian genre bik nei category panga a awm tawh sa bawk a, chung te chu 1989 atanga an tih tan rock, 1991 atangin alternative, 1993 atangin R&B leh 1999 atangin pop leh hip-hop te an ni.
2023 VMA hi September ni 12-a sem tur niin, Prudential Center, Newark, New Jersey-ah nghah a ni a, show host tur an la puang lo va, nikum khan Prudential Center-ah tho hian award hi an lo sem tawh a, Jack Harlow, LL Cool J leh Nicki Minaj ten an host.
Fans ten gender-neutral category 15-ah vote.mtv.com atangin September ni 1 thleng vote an thlak thei a, best new artist bik hi chu live show neih lai thlengin vote a thlak theih dawn a, social category- group of the year leh song of the summer nomination chu hun dangah an la puang leh dawn a ni.
2023 MTV Video Music Awards Nomination-ah Taylor Swift a langsar ber
