Wembly Stadium-a 2024 UEFA Champions League final match Borussia Dortmund leh Real Madrid FC ten an khelh hma, pregame show-ah rocker Lenny Kravitz a che pui hle a, rock ‘n’ roll boruak pui takin a chhawpchhuak.
Kravitz hi kum 60 hmel hmuin, sorkar hnathawk pension kum rualpui te ni ve tawh mah se a la tal thei le a, minute ruk chhung show ropui, mit leh beng titlai tak a la chhawpchhuak theia, ‘Fly Again’ hlaa bul tanin a tawp khar nana rimawi khawvela a hming chher tan tak takna ‘Are You Gonna Go My Way’ ngei mai chu a hmang zui bawk.
Champions League hi khawvela football club tha rual inelna niin, German club tha Dortmund leh Spanish club ropui Real Madrid ten final hi khelin, fans 90,000 vel zetin a hmunah an en bakah khawvel hmun hrang hrang atangin TV lamah maktaduai 100 chuangin an en niin an chhut bawk.
Kravitz sawi takah chuan kumin hi a kum that kum a ni ngei ang, hmanni lawka Hollywood Walk of Fame-a a puala arsi an awng a, 2024 People’s Choice Awards-ah Icon Award a dawng a, CFDA fashion icon award a dawn bakah Rock and Roll Hall of Fame nomination-ah a hming a lang bawk. Tunlai hiana studio album 12-na tihlar hna a thawk mek bawk a, June ni 23 atanga tanin summer European arena & festival tour a nei dawn bawk a ni.
2024 Champions League final pregame show-ah Lenny Kravitz
