Lemchan lama chawimawina sang, kum khat chhunga movie leh television huanga che tha te puala chawimawina, Golden Globe Awards nomination chu an puang leh ta a, film nominee-ah Barbie a langsar ber a, nomination pakua a nei a, chung zingah chuan best original song, motion picture category-a nomination pathum a neih pawh a tel.
Barbie film hla ‘Dance the Night,’ ‘I’m Just Ken,’ leh ‘What Was I Made For?’ te chu best original song caregory-ah nominate vek an ni a, he category-ah hian Barbie hla ni lo, hla dang pathum a lang tel bawk. Heng Barbie hla pathum te hi Oscar nomination-ah pawh lang thei ngei tura rinkai an ni a, mahse, Oscar rules-ah chuan film pakhat atangin hla pahnih bak category pakhatah a lan a rem dawn lo thung a ni.
Goldel Globe history-ah pawh tun hi best original song category-a film pakhat atanga hla pahnih aia tam a lan vawi hnihna chauh a la ni a, tun ni lo, hetiang hi a thlen tawhna vawi khat chu 1992 kha niin, Aladdin film atangin he category-ah hian hla pathum nominate a ni.
Best original score- motion picture-ah mual liam tawh Robbie Robertson chu ‘Killers of the Flower Moon’ avangin nominate a ni a, he category nominate midang panga te nen, best original score a nominate composer te hi US pawna piang vek an ni a, 2006 hnua hetiang hi a thlen lehna hmasa ber a la ni.
Barbie hi Golden Globe-a category an telh thar, cinematic & box office achievement-ah pawh nominate a ni a, he category-ah hian Taylor Swift pawh a concert movie ‘Taylor Swift: The Eras Tour’ a lang ve bawk.
Film lamah Barbie dawta langsar chu Oppenheimer niin, nomination pariat a nei a, Killers of the Flower Moon leh Poor Things ten nomination pasarih ve ve neiin, Past Live (5) leh Anatomy of a Fall, Maestro leh May December ten nomination pali theuh an nei bawk.
TV lamah Succession a langsar ber a, nomination pakua a nei a, The Bear leh Only Murders in the Building ten panga ve ve neiin an dawt a, The Crown-in nomination pali a nei bawk.
Golden Globe an sem leh tur hi a vawi 81-na a ni tawh dawn a, January ni 7, 2024-a sem tur niin, show hi Glenn Weiss leh Ricky Krishner te cy executive producer an ni dawn a, Weiss hian a direct bawk ang.
2024 Golden Globe nomination-ah Barbie a langsar
