2024 MTV EMA perform tur zingah Sawn Mendes leh Benson Boone an tel

2024 MTV EMA perform tur zingah Sawn Mendes leh Benson Boone an tel
2024 MTV European Music Award chu November ni 10 ian Co-op Live, Manchester, UK-ah an sem dawn ta a, award semna show-a perform tur an puan zinga Sawn Mendes, Benson Boone, RAYE, Teddy Swims leh Mexican sister trio Te Warning te pawh an tel.
Perform tur an puan zinga artist pali- Boone, RAYE, Swims leh The Warning te hi Grammy nomination-ah best new artist category-a lang tura rinkai an ni a, RAYE hian March ni 2-a an sem Brit Award a lo dawng taw a, Boone hian September ni 11 khan MTV VMA-ah best alternative a dawng tawh bawk.
Kumin MTV EMA nomination-ah hmeichhe lam an langsar zawka, nomination ngah zual artist 11 zinga 10 chu hmeichhia an ni a, Taylor Swift langsar berin nomination pasarih a nei a, chung zingah chuan best artist, best video, best pop leh biggest fan te pawh a tel.
Ariana Grande, Billie Eilish, Charli XCX leh Sabrina Carpenter ten nomination panga theuh neiin Swift an dawt a, Ayra Starr, Beyonce, Kendrick Lamar, LISA, Chappell Roan leh Tyla ten nomination pali theuh an nei bawk. Chappell Roan leh Tyla te hi MTV EMA nomination-a an vawi khat lanna a ni.
Tun hi UK-a MTV EMA an sem vawi riatna tur a ni ta a, nikum khan Paris-a award semna hi neih an tum a, mahse, Israel leh Hamas indo avangin award sem ma kar hnih a la awm tihah an thulh thu an puang a, MTV EMA history kum 30 chhunga award an sem loh vawi khatna a ni.