2024 MTV Video Music Awards semnaa perform tur an puan belh a, LISA, Halsey, Benson Boone leh Lenny Kravitz te hming a lang a, award hi September ni 11 hian New York-a UBS Arena-ah an sem ang.
Boone hi MTV VMA-a a perform vawi khatna tur a ni a, LISA pawh hi solo artist ang chuan a vawi khatna tur a ni a, BLACKPINK angin nikum hmasa khan an hla hit ‘Pink Venom’ an lo chetpui ve tawh bawk.
Halsey hian a hla thar a perform dawn a, ani hian album thar a tichhuak dawn hnaia chumi vawrh lar pah nan chuan a remchang dawn khawp mai. Halsey hi 2016 khan VMA-ah hian a lo perform dawn a, chumi tum chuan The Chainsmokers te nen an cheho a, an hla hit ‘Closer’ chetpui.
Lenny Kravitz hi VMA-a a perform hnuhnun ber chu 1998 kha a ni daih tawh a, chumi tum chuan Madonna hla hit ‘Ray of Light’ an sa dun kha a ni a, lead artist ang chuan 1993 kha a perform hnuhnun ber niin, a hla hit ‘Are You Gonna Go My Way’ hla sain, John Paul Jones-a’n a pui nghe nghe a ni.
LISA hian kumin VMA-ah nomination pali a nei a, Boone-a’n pathum neiin, Kravitz-a’n pakhat a nei ve bawk. LISA, Halsey leh Kravitz te ian award pawh an lo dawng theuh tawh a. 2022 khan LISA hi Korean solo artist anga VMA dawng hmasa ber niin, ‘Lalisa’ avangin K-Pop award a dawng a, Halsey pawhin 2019 khan BTS a feature-na ‘Boy With Luv’ avangin best male video dawngtu zinga a tel a, Kravitz hian 1993 khan ‘Are You Gonna Go My Way’ avangin best male video a dawng ve thung.
Kumin MTV VMA nomination-ah hian Taylor Swift langsar berin nomination 10 a nei a, Post Malone-a’n nomination pakua neiin a dawt a, Ariana Grande, Eminem leh Sabrina Carpenter ten paruk theuh neiin, Megan Thee Stallion leh SZA ten panga ve ve an nei a, LISA, Olivia Rodrigo leh Teddy Swims ten pali theuh an nei bawk.
2024 MTV VMA perform turah LISA, Halsey, Benson Boone leh Lenny Kravitz an tel
