in 2025-26 thla sarih chhungin India-in electric bungrua a thawn chhuah chu a hma kum tun ang hun aiin 37.9%-in a pung a, $ tluklehdingawn 26.29-in a thawn chhuak tam zawk a. Kum kal ta thla sarih chhungin $ tluklehdingawn 19.07 man a thawn chhuak.
India-in bungrua a thawn luh tamna ber hi US niin United Arab Emirates leh China ten an dawt.
US chuan Indian electric bungrua a lak luh hi 2024-25 kum chanveah $ tluklehdingawn 5.12 man la lutin kum kal mekah chuan 135.9%-in a pung a, $ tluklehdingawn 12.08 man a la lut tih commerce ministry chuan a chhinchhiah.
US-a Donald Trump-a sorkar chuan India atanga bungrua an lak luhah chhiah 50% la mah se electric leh smart phone bik hi a ngaihhnathiam a, hei hi America-a hetiang chi an inhralh a pun phah chhan a ni.
UAE chu India atanga electric bungrua la lut tam ber pahnihna niin 2025-26 chhungin $ tluklehdingawn 2.30 man an la lut a, a hma kum tun ang hun aiin 62.6%-in an la lut tam.
China-a thawn chhuah pawh a pung nasa a, hei hi bungraw pawimawh bik an lak luh nasat vang a ni a. Kum kal taa aiin 125.8%-in an la lut tam a, $ maktaduai 998.98 man an la lut.
India atanga electric bungrua la lut thin zingah Netherlands chu a hma kum aia la lut tlem awm chhun an ni a, 2024-25 hhunga $ tluklehdingawn 1.15 man la lut khan kumin thla sarih chhungin $ maktaduai 665.73 man chauh la la lutin 42% zetin a hniam a. Hei hi Europe-a thil siam chhuah thar a tam avang leh thil man to chi an lak luh tlem vang niin sorkar hnuaia hetiang lam ngaihven an sawi.
Sumdawnna lama mi thiamte chuan electric bungraw thawn chhuah a pung zawnga a kal hi India-in thil siam chhuah kawnga theihna a pho lang a, chumi pui tura scheme tha a awm vang nia an ngaih thu an sawi.
Kalphung tha, tual chhunga siam chhuah tam leh khawvel pum huapa bungrua thiar leh kalpui velna tha ta chu a hlawkpui niin an ngai a. Hetiang zel a nih chuan electric bungraw hmanga sumdawnna hi 2025-26 chhunga India-a thil thawn chhuah lian leh sum siam hnem a ni thei dawn niin an ngai a ni.
India-in electrc bungrua a thawn chhuah tam ber hi smartphone, consumer electronic leh semiconductor kaihhnawih hmanrua an ni.
2025-26 thla sarihah India electric bungraw thawn pung nasa
