Hmun hnih – Khatla ami leh Raj Bhavan bula Assam Rifles DIG chenna tih loh, Lammual leh a chhehvela Assam Rifles ram luah chu 2025 April ral hma in chhuahsan kim turin thu thlun fel a ni. Chief minister Lalduhoma chuan Assam Rifles chhuah tur chungchangah hian October 23 khan New Delhi-ah insuanchhuahna turah hian memorandum of agreement (MoA) ziah a ni a. Mizoram sawrkar aiawhin GAD commissioner & secretary Vanlaldina Fanai leh Assam Rifles aiawhin director general Lt. Gen. Vikas Lakhera ten hming an ziahhnan a; chief minister personal secretary Lalrinawma Khiangte leh Assam Rifles resident director Col. Navjot Singh te chu hriatpuitu ah an tang a. MoA ziahnaah hian Mizoram MLA 8 chu New Delhi-a an awm lai a nih angin an ni pawh an tel tih a sawi a ni.
Ram chhuahsan tur zingah hian sawrkar hmasa hunlai pawha draft agreement an lo siamah pawh an chhuahsan loh tur zinga an dah tel, Quarter Guard hmun leh Loch House pawh tun tuma an chhuahsan turah hi chuan tih tel a ni tih sawiin, inremna ziah (23.10.2024) atanga thla thum chhungin AR-in an luah – Chite lui chhehvel (Dhobi Nallah) acres 62.8, AR biak in leh a bul vel ram acre 0.63 leh Babutlang ram leh an bungrua acre 0.453 a zau chu chhuahsanin Mizoram sawrkar kutah an hlan ang. AR school chu academic session kal mek a nih avangin, 2025 April ral hma in an chhuah san ve thung anga, hetah hian a chhehvel ram – Lammual area (Main Barrack Complex, Unit Hospital leh Lammual) acres 25.94, Loch House (land & building) acre 1.1, Quarter Guard Hill Complex acres 14.5, school area acre 1, War Memorial & Mandir acre 0.78 a tel dawn tih a sawi.
Hetihlai hian Assam Rifles-in an luah, Khatla-a HQ 23 Sector Mizoram chin zawng leh Raj Bhavan chhim lam gate chhaka Assam Rifles DIG chenna atana hman mek chu an chhuahsan ve dawn lo tih chief minister hian a sawi bawk.
“Mizoram sawrkar chuan Assam Rifles building luah lai, inremna anga hlan tur hi a man (depreciated cost) chu 2025 April ral hma in Assam Rifles a pe anga, Assam Rifles-in Mizoram sawrkar hnena a hlan ram leh building hi ‘Mizoram (Restriction on Use of Transferred Land) Act 2022’ sawi angin, mipui tana hman (reserve) tur a ni,” a ti.
April 2025 daih daih an tih chhan chu, sawrkar lam pawhin Zokhawsanga a tih tur la zawh fel loh a nei ve tho a, loneitute fehna kawng chungchang pawh chinfel ngai a la awm tih a sawi a. Hemi chhung hian sawrkarin a tih tur ang ang chu ti zo hman turah an inngai tih a sawi a ni.
Aizawl laili atanga Assam Rifles insuanchhuah tir chu official level-a sawi ho a nih apiangin, hmasawnna hmuh tur a awm meuh thin loa, an tih dan thlakin sipai hotute nen inthianthatna atanga chinfel tumin an bei ta tih Lalduhoma hian a sawi a. Hmasawnna an neih ang ang pawh puangzar nghal zel loin tun hi an thleng thei ta tih a sawi a ni.
Tuna Aizawla awm mek 2 Assam Rifles chu nakum April hian an chhuak dawn tih chief minister hian a sawi bawk a. Tunhnaia thil duhawm lo thleng ang chi chu a thlen nawn tawh loh nan Assam DG hian operation inkaihhruaina inhrilh tharin an duang tha dawn tih a lo hrilh tih a sawi.
Zawhna chhangin chief minister chuan, minister leh Assam Rifles inkara thil thleng chu, pawn lamah an naute na takin tan angin lang mah se, an hotuten an naute chungah hian na takin action an la tih an hriat thu a sawi bawk.
2025 Aprilah Aizawl laili atangin Assam Rifles chhuak kim dawn
