2025 Billboard Top Artist – Morgan Wallen
Country star Morgan Wallen chu year-end Billboard Top Artist chart-ah No.1 a ni a, kum tluana an dinhmun thlira hetianga kum tawpa top artist-a a puan a nih vawi khatna niin, mipa country artist zingah tun kum 30 chuang chhunga hetiang dinhmuna ding thei hmasa ber a ni bawk.
Morgan Wallen hian a album hit zet mai “I’m the Problem” kumina tichhuakin, kum hmasa lama a album “One Thing at a Time” bakah a lar chhuahna album “Dangerous: The Double Album” te pawh vawiin thlengin Billboard 200 (albums) chart-ah dinhmun sang takah an la ding thei a ni.
“I’m the Problem” hi year-end Billboard 200 Albums chart-ah pawh No.2 a ni thei a, he album hi May thla tawp khan chart No.1 rawn kaiin, kar 12 chhung chart-ah a No.1 thei a, hei bakah hian Billboard Hot 100 (US singles) chart lama pawh a duai lo riau a, he chart-a lang thei hla 41 kuminah neiin, chung zingah pakua chu chart top 10 a kai a, ‘What I Want’ (featuring Tate McRae) cu No.1 a kai thei bawk.
2009-a Taylor Swift-in country hla chauh a la record thin laia Billboard year-end Top Artist a nih hnua, country hla chauh record zinga Top Artist ni leh thei hmasa ber chu Morgan Wallen hi a ni a, 1993-a Garth Brooks hnua mipa country artist zinga hetiang dinmuna ding leh thei hmasa ber a ni bawk.
Taylor Swift pawh 2025 year-end ranking-ah hian a langsar hle a, a album ‘The Life of a Showgirl’ chu year-end Billboard 200 Albums chart No.1 a ni a, hetiang dinhmuna tum nga a dinna niin, year-end Billboard 200 Albums chart-a tum thum aia tam No.1 ni thei awm chhun a ni.
Swift hi hmeichhe zaithiam lamah top female artist niin, top duo/group chu animated KPop Demon Hunters group HUNTRIX an ni a, HUNTRIX tana aw thawhtu te hi EJAE, Audrey Nuna, REI AMI te an ni. Alex Warren chu top new artist niin, ani hian kuminah a hla ‘Ordinary’ chu khawvel huapin a rawn larpui a, Billboard Hot 100-ah pawh kar 10 zet a No.1 pui thei a, a album “You’ll Be Alright, Kid” chu Billboard 200 chart-ah No.5 a kaipui thei bawk.
2025 Billboard Top Artist – Morgan Wallen
