2025 Grammy-ah record siam an awm nual
2025 Grammy an sem zawh takah khan Grammy record siam an awm nual a, Beyonce ‘Cowboy Carter’ chuan country album of the year a dawng a, mihang hmeichhe zinga tun kum 50 chhunga country music category hrim hrim a award dawng thei hmasa ber a ni. ‘Cowboy Carter’ hian big four category-ah album of the year a dawng bawk a, Natalie Cole, Whitney Houston leh Lauryn Hill te hnung zuiin, mihang hmeichhe zinga he category-a award dawng thei palina a ni bawk.
Kumin Grammy-ah hian Beyonce hian award pathum dawng lehin, tihian Grammy Award a dawn tawh zawng zawng chu 35 a tling ta a, zaithiam zinga Grammy dawng hnem ber record a siam lai chu a sawh nghet leh ta sauh a ni.
Kendrick Lamar chu kumin Grammy-a award dawng tam ber niin, panga a dawng a, Sierra Ferrell-i’n pali dawngin a dawt a, Beyonce, Charli XCX leh St. Vincent ten pathum theuh an dawng a, Jon Batiste, Sabrina Carpenter, Gustavo Dudamel, Samara Joy leh CeCe Winans ten panih theuh an dawng bawk.
Chappell Roan-i’n best new artist a dawng a, tun kum riat chhung chu he award hi hmeichhe solo artist ten an dawng ta a, hmeichhe zaithiam ten he category-a award an dawn zawn rei ber a la ni.
Sabrina Carpenter-i’n ‘Short n’ Sweet’ avangin best pop vocal albuma dawng a, he category-ah hian a hmaa award lo dawng tawh mi pathum- Taylor Swift (vawi hnih dawng tawh), Ariana Grande leh Billie Eilish te nen awm hoin, mithar Chappell Roan a tel bawk a, anni ho zinga award dawngtu nih hi inchhuanna tham tur chu a ni.
Lady Gaga leh Bruno Mars ‘Die With a Smile’ chuan best pop duo/group performance a dawng a, Gaga tan he category-a award a vawi thum dawnna niin, Bruno Mars tan a kum zawna Grammy Award kum 12a dawnna a ni ta, kum 12 chhung a zawna Grammy dawn theih hi thil namai lo tak a ni.
The Beatles-in ‘Now and Then’ avangin best rock performance an dawng a, rock category-a award an dawn vawi khatna a ni (Grammy-ah hian rock puala category bik hi 1980 atanga an tih tan chauh a ni).
Rolling Stones ‘Hackney Diamonds’ pawhin best rock album a dawng a, Rolling Stones hian he category-ah hian 1995 khan award an lo dawng tawh a, The Beatles leh The Stones-in tum khatah Grammy an dawng a, 1960s rock group langsar pahnihin kum khata Grammy an dawn vawi khatna a ni.
Chris Stapleton-a’n best country solo performance a tum nga nan a dawng a, he category-a award dawng ngun ber a nihna a sawh nghet a, amah hnaih bertu Carrie Underwood leh Willie Nelson ten tum hnih ve ve an dawng tawh.
Beyonce featuring Miley Cyrus ‘II Most Wanted’ chuan best country duo/group performance a dawng a, he award hi country pawn lama mi ve ve inkawpin an vawi khat dawnna a ni.
Kendrick Lamar-a’n ‘Not Like Us’ avangin best music video a dawng a, he award hi tum thum a dawnna a niin, he category-a award dawng ngun ber a la ni. Lamar hian best rap performance pawh a tum sarih nan dawngin, he category-a award dawng hnem ber a ni bvawk.
Jay-Z pawhin Cowboy Carter-a songwriter a nihna angin award a dawng a, Grammy 25 a dawng tling ta a, mimal anga rap artist zinga Grammy dawng hnem ber a ni ta. A hmain Kanye West nen an award dawn zat a inang a, Ye hi a kalsan ta a ni.
Rin loh takin Amy Allen-i’n songwriter of the year, non-classical a dawng a, ani hi hmeichhe zinga he category-a award dawng thei hmasa ber a ni.
2025 Grammy-ah record siam an awm nual
