2025 MTV VMA-ah hmeichhe lamin ro an rel

2025 MTV VMA-ah hmeichhe lamin ro an rel
Rimawi lama award ngaihhlut hlawh tak MTV Video Music Awards (MTV VMA) chu an rama Pathianni zan, keini tana Thawhtanni tuk kan UBS Arena, Elmont, New York-ah an sem ta a, a mimal angin Lady Gaga a langsar ber a, award pali a dawng a, award ngaihhlut video of the year chu Ariana Grande-i’n a dawng bawk.
Lady Gaga hian artist of the year a dawng leh a, 2017 khan a lo dawng tawh bawk a, he category-a award tum hnih dawng thei pahnihna a ni a, Taylor Swift-i’n a hmain tum hnih a lo dawng tawh bawk. Gaga hian award pali dawn belh lehin, tihian MTV VMA 22 a dawng tling ta chiah a, he award dawng tam lamah pathumna niin, Taylor Swift leh Beyonce ten award 30 ve ve dawng tawhin, anni pahnih chiah hi a pha lo. Gaga hi award 20 dawng tawh Madonna-i’n a dawt ve leh bawk.
Kumin MTV VMA-ah hian award 30 an sem chhuak a (social category leh award dawngtu an lo puan lawk tawh telin), hmeichhe zaithiam lamin ro an rel hneh hle a, award 30 zinga award 22 chu hmeichhe solo artist leh hmeichhe hlang group ten an dawng a, mipa solo artist leh mipa hlang group-in award paruk dawngin, mipa leh hmeichhe zaidun-in award panih an dawng bawk.
Genre bik puala caregiry 10-ah hmeichhe lamin award pariat an dawng a- Sabrina Carpenter, best pop artist; Grande, best pop; Doechii, best hip-hop; Mariah Carey, best R&B; Shakira, best Latin; LISA featuring Doja Cat & RAYE, best K-pop; Tyla, best Afrobeats; leh Megan Moroney, best country te niin, genre bik neia award pahnih chu mipa lam atangin sombr (best alternative) leh Coldplay (best rock) an dawng ve thung.
Gaga leh Bruno Mars ten ‘Die With a Smile’ avangin best collaboration an dawng a, Gaga hian he category-ah hian award tum thum a dawnna a ni ta a, a hmain ‘Telephone’ (featuring Beyonce) leh ‘Rain on Me’ (Ariana Grande nen) a dawng tawh bawk a, Taylor Swift nih rualin, he category-a award dawng ngun ber an ni dun ta rih a ni.
Ariana Grande hian ‘Brighter Days Ahead’ avangin video of the year bakah best long-form video a dawng tel a, best long-form video hi tum li an semna niin, hmeichhe zaithiam hlirin an la dawng a, an sem hmasa ber 1991-ah Madonna-i’n ‘The Immaculate Collection’ avangin a dawng a, an sem vawi hnihna 2016-ah Beyonce-i’n ‘Lemonade’ avangin a dawng a, a vawi thumna, 2022-ah Taylor Swift-i’n ‘All Too Well: The Short Film’ avangin a dawng bawk.
Sabrina Carpenter pawh kumin MTV VMA-a langsar pawlah telin, award pathum a dawng a, Bruno Mars, Tate McRae, Doechii leh Mariah Carey ten award pahnih theuh an dawng a, Bruno Mars hi mipa lama award pakhat aia tam dawng awm chhun niin, a award dawn pahnih pawh hi hmeichhia a zaipuina atanga a dawn ve ve a ni. ROSE leh Lisa ten mimal angin award pakhat ve ve an dawng a, an group BLACKPINK-in award pakhat dawng bawkin, anni pahnih pawh hi award pahnih dawng anga chhiar tel theih an ni ang.
Kumin hian nomination lama langsar tak tak, award dawng ta lo an awm nual a, chung zingah chuan nomination pasarih nei The Weeknd bakah nomination pali theuh nei Bad Bunny, Ed Sheeran, Jelly Roll, Miley Cyrus leh Morgan Wallen te pawh an tel.
Alex Warren-a’n best new artist a dawng a, 2017-a e category-ah Khalid-a’n a award a dawn hnua mipa zaithiam he category-a award dawng leh thei hmasa ber a ni. BLACKPINK pawhin best group an dawng a, he category-ah hian a zawnin kum sarih chhung chu K-pop group-in award an dawnna a ni ta a, BTS-in tum li dawng tawhin, BLACKPINK-in vawi nih leh SEVENTEEN-in vawi khat an dawng tawh.
Lisa-i’n a tum thum nan best K-pop a dawng a, he category-a award dawng ngun ber BTS a nih rual ta chiah. He category i 2019 atanga an telh tan a ni a, Lisa hian kuminah Doja Cat leh RAYE a thawhpuina ‘Born Again’ avangin a dawng.
MTV VMA hi kum 42 an semna niin, kumin hian a vawi khat nan category tar best country an tel ve chauh a, Megan Moroney-i’n “Just Keep Watching” avangin a dawng.
Non-competition category lama chawimawina Mariah Carey (Video Vanguard Award), Ricky Martin (Latin Icon Award) leh Busta Rhymes (Rock the Bells Visionary Award) ten an dawng bawk.