2025 MusiCares Persons of the Year- Grateful Dead
Grateful Dead hi band lar leh hriathlawh ni si-ah chuan Grammy nomination-ah pawh vawikhatmah la lang lo an ni a, mahse, rimawi kawvela legend tih hlawh pha khawpa band ropui an ni tlat lawi si a, Billboard Hot 100 (singles) chart-ah pawh No.1 chu sawi loh, top 40-ah takngial pawh hla pakhat chauh an nei thei. Mahse, he band hi 2025 MusiCares Persons of the Year an hlan dawn tlat si a ni.
2025 MusiCares Persons of the Year gala hi a vawi 34-na tur niin, January ni 31, 2025 khian Los Angeles Convention Center-ah an nei dawn a, chu chu 67th annual Grammy Award an sem hma zan hnih a la awm tihna a ni. Grateful Dead hi band zinga MusiCares Persons of the Year chawimawina an hlan pathumna tur an ni.
Grateful Dead hian 2025-ah kum 60 an tling ve dawn chiah bawk a, original member Mickey Hart, Bill Kreutzmann, Phil Lesh leh Bobby Weir te chu rimawi lama an thawh hlawk avang leh midang te tana an luanchhuahna avang tein an chawimawi dawn a ni. He event-ah hian an band founder zinga mi, 1995-a kum 53 mi ni a chatuan ram pan tawh Jerry Garcia pawh chawimawina dawng turah an telh.
Grateful Dead hi 1965 a din niin, American history-a band influential ber te zinga mi niin, rock, folk, jazz leh avant-garde music thiam taka an chawhpawlh thin chu mite hriat an hlawhna pakhat a ni. An band hi kumin December thlaa lak luh tur 47th class of Kennedy Center Honorees zingah an tel a, Bonnie Rait, Arturo Sandoval, Francis Ford Coppola leh Apollo Theater te nen lam luh an ni ang.
Grateful Dead hian concert vawi 2,318 an nei hman a, hei hi vawiin thlengin world record a la ni reng a, 1977-a Barton all Concert, Cornell University-a an neih an record chu National Recording Registry-ah 2011 khan lak luh a ni tawh bawk.
He band hi Grammy nomination-ah vawi khatmah an la lan loh rualin, an album pahnih chu Grammy Hall of Fame-ah lak luh a ni tawh tung a, 1970-a an studio album Workingman’s Dead leh ‘American Beauty’ te chu Grammy Hall of Fame-ah lak luh niin, 2007 khan an band hi Recording Academy Lifetime Achievement Award hlan an ni tawh bawk. Grateful Dead hi 1994 khan, Garcia thih hmain Rock and Roll Hall of Fame-ah lak luh an ni tawh bawk.
An band ian Billboard 200 (albums) chart a lang thei 124 tehmeuh an nei a, he chart-a an album thleng sang ber chu 1987-a ‘In the Dark’ album niin, No.6 a kai, he album-a an hla ‘Touch of Grey’ chu Hot 100 chart-ah top 10 a kai a, an band hla he chart top 10-a kai thei awm chhun a ni. An band signature song an tih mai ‘Truckin’’ chu 1971 khan No.64 a kai a, an band hla Hot 100 a thleng sang ber dawttu a ni.
2025 MusiCares Persons of the Year- Grateful Dead
