YMA General Conference 2025 thlirlawkin Zirtawpni khan Tuivawl bialtu MLA Lalchhandama Ralte hoin Sakawrdaiah thutkhawm a ni.
Sakawrdai khuain 2025 October-a YMA inkhawmpui lian a thlen turah kawng hrang hranga inbuatsaih dan tur sawi a ni a. Khawchhunga kohhran, political party leh tlawmngai pawl hrang hrang aiawhte bakah Sakawrdai khaw thenawm Thingsat leh Vaitin atangin khawtlang hruaitute an tel a ni.
MLA chuan a bial chhung Sakawrdaiin YMA General Conference 2025 a thleng tur chu lawmawm a tih thu a sawi a. Chhungkaw tinin palai a tam thei ang ber an thlen theihna’n tun atanga inbuatsaihna ngai a, YMA inkhawmpui neih tawh zawng zawnga palaite hriatreng tlak an siam theihnan khawtlang mipui tanrual a ngai tih a sawi. Bialtu MLA a nih ang pawhin theihtawp a chhuah dawn tih sawiin, sawrkar lamah tul leh buaipui ngai a awm a nih pawhin theihtawpa ke a pen tur thu a sawi a ni.
Inkhawmpui thlen turah hian Organising Committee member 35 inruatinm hma lak tan a ni tawh a. Sub- Committee pasarih (7) din tawhin, Organising Committee hi tum 4 an thukhawm tawh a ni.
2025 YMA Inkhawmpui thleng tur Sakawrdai an inbuatsaih tan
