2026 F1 calendar thlir teh ang
Season tharah hian Spain ramah Formula One chuan race vawi hnih an nghat dawn a, a chhan pawh 24-round calendar atanga Italy tlankawng lar Imola lama tlan mi Emilia-Romagna Grand Prix an paih hnuah Madrid street circuit thar chu a debut nghakchhuak tura an sengluh tak vang a ni.
He thu hi kan hnung deuh khan FIA chuan puangin, Melbourne khawpuia Australian Grand Prix chu season-opener tur bawk ni lehin, nakkum March ni 8-a tlan tura dah a ni a; China khawpui lian Shanghai circuit chuan chawlhkar khat hnuah round two a dawl ve thung ang.
Season thar hi he sport-in ‘new engine era’ an nghah chhuah kum a ni dawn a, Cadillac pawh team 11-na ni turin kan hmu dawn a ni.
March ni 29-ah round three chang tur Japan ramah F1 team-ho an fuankhawm chhunzawm ang.
June 7 tura dah Monaco chu European round hmasaber dawltu tur niin, Canada nen an inthlakthleng a, heti a nih tak avangin Montreal race chu May ni 24-a tlan tur niin, May ni 3-a tlan tur Miami-in a dawt.
Kumina 24 Hours of Le Mans endurance race nena insubuai Canada chu Indianapolis 500 nena intauh lo tura ruahman a ni bawk.
Contract neih laia a kum tawp berna nakkuma lut chho tawh tur Barcelona tlankawng Circuit de Catalunya lama tlan mi Spanish Grand Prix chu June ni 14 atan dah niin, contract ziah thar a ni tawh lo.
Madrid khawpuia street circuit thar Madring chu hr khawpuia IFEMA exhibition centre hual vela siam niin, Europe khawmualpui bika race tawp berna a chang ang a, Monza lama Italian Grand Prix an tlan zawh September ni 13-a tlan tur a ni.
Kum 2026 hnu lama kan hmuh zui tawh hmel rih loh Zandvoort tlankawnga Dutch Grand Prix chu August ni 23 atan dah niin, Inrinni lama intlansiak aitechhinna, a chak berin point khat an hmuh theihna sprint race keng tel tur a ni nghe nghe.
FIA chuan kum tharah hian F1 2026 sprint event paruk a zep tel leh dawn a, chu’ngte chu China (13-15 March), Miami (1-3 May), Canada (22-24 May), Great Britain (3-5 July), Netherlands (21-23 August) leh Singapore (October 9-11)-te a ni.
February leh March thlaa Muslim-te thlaserh Ramadan a tlak avangin Bahrain leh Saudi Arabia chu April thlaah an tlan indawt ang.
Season hmawrbawkna chu Arab race dang Qatar zawh December ni 5 atan Abu Dhabi-ah nghah a ni leh.
Formula One Chief Executive Stefano Domenicali chuan nakkum calendar-a Madrid an senglut thei lawmawm a tih thu sawi chungin automotive brand hawr pui pui – Audi, Cadillac leh Ford tihte’n Formula One grid an zawm ve tain a tihlawm thu a tarlang tel.
Swiss-based Sauber chu nakkum hian Audi works team an ni dawn a; Ford chu Red Bull nena thawkdun tur ni bawkin, Formula One hian 100 percent sustainable fuel a nei a ni.
He calendar tharah hian chawlhkar indawta vawi ruk tlan zawn chhoh a awm dawn a, Austin, Mexico, Brazil, Las Vegas, Qatar leh Abu Dhabi-ah chawlhkar indawt zelin F1 driver-te an fuankhawm thin dawn a ni.
2026 F1 calendar
Australia 6-8 March
China 13-15 March
Japan 27-29 March
Bahrain 10-12 April
Saudi Arabia 17-19 April
Miami 1-3 May
Canada 22-24 May
Monaco 5-7 June
Spain (Barcelona) 12-14 June
Austria 26-28 June
Great Britain 3-5 July
Belgium 17-19 July
Hungary 24-26 July
Netherlands 21-23 August
Italy 4-6 September
Spain (Madrid) 11-13 September
Azerbaijan 25-27 September
Singapore 9-11 October
United States (Austin) 23-25 October
Mexico 30 October-1 November
Brazil 6-8 November
Las Vegas 19-21 November
Qatar 27-29 November
Abu Dhabi 4-6 December