2026 Fifa World Cup-ah Messi kan hmu dawn?
Argentina-in Qatar rama kum 2022 World Cup trophy an chawi theihna kawnga an player thawhhlawk leh hlu berte zinga mi Lionel Messi chu Argentine mipui bakah khawvelin nakkum World Cup-ah hian hmuh leh an chak a, a inlan ngei dawn tih tih la sawi chiang thei lo mah se amah pawhin he tournament khelh hi a la sawibo phal bik lo mai ni loin United States, Mexico leh Canada-te inthlentawm tur 2026 tournament-ah hian a inlan beiseina a lian chho zel!
Kumin nipui thawt ruala kum 38 kai chho ve tawh tur Messi hi nakkum World Cup thlengtu tur ram pakhat US leilunga professional football khel mek a nihna bakah Inter Miami tana pawha an innghahna lian a la nih chhoh zel theih avang te, Arab ram tournament leh tun inkara a khelh dan, a hawiher leh rilru put hmang reng rengah a football zinkawnga hnualna emaw hniamna emaw engmah hmuh tur a la awm loh kal zel avangin nakkum Fifa tournament pui berah hian a inlan theih lohna tur tun dinhmunah chhuanlam hriat tur a vang rih hle a ni!
2026 Fifa World Cup khel tura tling chiang tawh Argentina captain banhren a rawn hren leh ngei rinna tizual turin tunhnai khan Inter Miami lama a team-mate ni leh mek Luis Suarez chuan tawngkam bengverh zet mai a cheh a, Messi chuan ram tan nakkum World Cup title humhim leh a chak niin a sawi!
Tunhnaia El Pais chanchinbuin an kawmnaah Suarez hi amah leh eight-time Ballon d’Or winner Messi-te’n an chawlh hun tur chungchang an lo sawi chhin ve tawh reng reng em tih an zawt a, tah chiah hian Uruguayan chuan nakkum World Cup leh Messi inzawmna chungchanga chanchin tharlam leh bengverh zet chu a sawichhuak ta a ni.
Suarez chuan, “Chawlh chungchang engmah kan la sawi dun lo. Messi phei hi chuan nakkum World Cup hi khelh leh a la chak nghe nghe,” a ti!
“Thil chiang deuh chu, national team atanga han kalbo deuh vang vang takah chuan kirleh chakna hi a lo chuai ve thei a, kei aiin Messi hi ram tana inkhelh kawngah a fei zawk a; engpawhnise, chawlh chungchang hi chu kan la sawi dun lo hrim hrim,” tiin El Pais palai zawhna a chhang.
Kum 38 mi ve bawk Suarez hian nakkum World Cup leh Messi chungchang a sawizawm zeuh hnuah reporter hian chu mi chungchang chu a zawt thuk nghal zet a, thianpain 2026 tournament khel tura thutlukna a la siam loh thu tarlang telin, “Ni lo e, ni lo e, a khelh ngei dawn leh dawn loh pawh ka la zawt bik lo hrim hrim a, kei chuan a ngainat zawng ka hria a ni mai a, World Cup trophy humhim tura Argentina tana khelmual a luh dawn leh dawn loh ka la zawt bik lo,” a ti.
Messi hian kum 2006 daih tawh khan rawlthar kum 18 mi lek ni chungin a vawikhatna’n World Cup a khel a, khawvel huap football inelna lian berhah hian kum 2010, 2014 leh 2018-ah inlan lehin, world champion ni lo zawngin a chawl nge nge dawn nia a lan hman thuak hnu kum 2022 khan Arab ramah trophy a chawi ta nge nge a; chu chuan football-a lawmman leh chawimawina a huih theih zawng zawng lakkimtir tawh mah se nakkumah hian khawvvelin a la beisei zui ta zel a ni…
2026 Fifa World Cup-ah Messi kan hmu dawn?
