2035 hnuah lungalhthei hmanga
power siamna din tum rih lo
India chuan kum 2035 hnu lamah chuan lungalhthei chakna hmanga power siam chhuah belh tuma ruahmanna a neih tawh loh thu power ministry hotu sangin a sawi.
“India hian energy indaih tawk neih a tum,” tiin Union Power Ministry Secretary Pankaj Agarwal-a chuan Pathianni khan ministry-in punkhawm an huaihawtna hmunah Reuters a hrilh a. “Kum 2035-ah chuan lungalhthei hmanga power siam chhuah hi gigawatt 307 tlintir kan duh,” a ti.
‘Kum 2035 hnu lama thil awm zel dan tur sawi nan erawh a la hma’ tih a sawi tel.
India hian ramin a mamawhna sang zelah kumin hian lungalhthei chakna hmanga power a siam chhuah zat, GW 210 chu 46%-a tihpun hman tuma ruahmanna neiin hma a la a, hetih lai hian non-fossil fuel atanga a siam chhuah pawh GW 500 ni mek chu kum 2030-ah a leta tam siam chhuah a tum bawk.
India hian thianghlim zawka energy siam chhuah a neih tam tawk loh avangin a sem darhnaah harsatna a tawk zauh zauh va, kum kal mekah pawh harsatna a nei zauh zauh thin.
Agarwal-a chuan kum thum liam ta chhunga power mamawhna san chak dan thlir leh thianghlim zawka siam chhuahte a sem darhna hmun lama pek chhuahna an buaipui mek karah lungalhthei chakna hmanga siam chhuah hi la tihpun zel rih an tum tih a sawi.
India hian power sem darhna bakah hian battery-a khawlnaah pawh chona lian tak a la hmachhawn mek tih Agarwal-a chuan a sawi a, sem darhna chin fel a nih hma chu kum 2035 hnu lama lungalhthei hmanga siam chhuahna hmun tihpun tumna a awm tawh rih lo tih a sawi.
India-ah hian lungalhthei tikanga power siam chhuah hi electricity a siam chhuah 75% chuang zet a ni a, hetih mek lai hian kumin thla 11 liam taah khan thla sarih chu a siam chhuah zat a tlahniam a, kum 2020 hnua a tlakhniam nasat ber a ni.
2035 hnuah lungalhthei hmanga power siamna din tum rih lo
