Daily Newspaper

24KGoldn ‘Mood’ a Hot thar leh

14

24KGoldn ‘Mood’ featuring Iann Dior chu Billboard Hot 100 (singles) chart-ah a No.1 thar leh ta a, hetihrual hian The Weeknd ‘Blinding Lights’ pawh No.3 a kai thar ve leh a, Dua Lipa leh DaBaby te pawh top 10-ah a lang ve leh ta bawk.

Billboard Hot 100 (singles) chart hi kar khat (Zirtawpni – Ningani) chhunga US-a hla lar dan tehna a ni a, chart ranking siam nan hian all-genre US streaming (official audio leh official video), radio airplay leh sales data te chu tehna pawimawh a ni.

24KGoldn ‘Mood’ featuring Iann Dior hi December ni 28, 2020 leh January ni 3, 2021 inkarah US-ah stream maktaduai 17.5 leh download sales 7,000 a la tling thei a, radio airplay pawh ngaithlatu maktaduai 82.3 nei anga chhut a ni bawk.

‘Mood’ hi October thla tawp chart-ah No.1 a kai a, November-ah kar thum No.1 lehin, chumi hnuah No.2, No.5 leh No.7-ah te a tawlh a, tunkar chart ranking-ah No.7 atangin No.1-ah a invawrh thar leh ta a ni.

Chart No.1 hlui Ariana Grande ‘Positions’ chu No.14 atangin No.2-ah a invawrh thar ve leh a, top 10 atanga chhuak tawh chart No.1 hlui bawk The Weeknd ‘Blinding Lights’ chu No.3-ah a invawrh thar ve leh bawk a, tihian he hla hi kar 43 chhung chart top 10-ah a lang tling ta.

Justin Bieber ‘Holy’ featuring Chance the Rapper chu No.21 atangin No.4-ah a invawrh thar ve leh a, BTS ‘Dynamite’ pawh No.44 atangin No.5-ah invawrh ve lehin, Chris Brown leh Young Thug ‘Go Crazy’ pawh No.26 atangin No.6-ah a insawn thar ve leh ta bawk.

Drake ‘Laugh Now Cry Later’ chu No.25 atangin No.7-ah a insawn ve leh ta a, Gabby Barrett ‘I Hope’ featuring Charlie Puth pawh No.30 atangin No.8-ah a kai thar ve leh ta bawk a, hetihlai hian kar kalta No.1, Mariah Carey ‘All I Want for Christmas Is You’ chu No.9-ah a tawlh ve thung.

Top 10 khartu chu Dua Lipa ‘Levitating’ featuring DaBaby niin, No.27 atangin No.10-ah a invawrh kai a, Dua Lipa tan chart top 10-a a lan vawi thumna niin, DaBaby tan a vawi ngana a ni ve thung.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy