– Jipson S. Hrangate, AFC Referee
33rd OLYMPICS KAN THLAHLIAM DAWN TA…!
Khawvel pumpui huapa infiamna chi hrang hrang infuankhawm intisiakna ropuiber Olympic Games vawi 33-na Paris khawpuia July ni 26, 2024-a tan tawh chuan a hmawr bawk lam a lo hnaih ta ther ther hle mai.
Infiamna chi hrang hrang 32 awmte thennawia item 329 lai inkhel mup mupte chu vawiin thleng hian 260 vel khelh zawh a ni tawh a, a la bak zawng 69-te hi naktuk, Pathianni tlai lam hian khelh zawh a ni tawh ang a, Sunday zan dar 8:30-ah Closing Ceremony chu Stade-de-France (Paris khawpui)-ah ropui taka hman a ni ang.
Hemi stadium mipui 82,000 zet thut theihna hmun hi 1998 World Cup football final khelhna hmun, France-in Brazil 3-0 zeta an tlawm a, champion trophy an chawikanna hmun kha a ni.
Olympics hi khawvela intihsiakna ropui ber a nih miau avangin a chhimtute (athlete leh a entute) an tam a; a then mi hausa tawntaw nawmchenna’n (sightseeing)-a hmang te, a then nupa tuak thar honeymoon hmangte leh inngaizawng fawr kual mekte bakah games ngainami/tuimi etc. an nih hlawm avangin Olympics tiak mai tur chu an ui em em a, an khuate a har thin bawk.
Chu mai bakah Olympics hun chhunga lo inthiantha/lo inkawmngeih leh lo in-star hmante pawh an awm thin a, Olympics zawh hnuah pawh la inumzui zela innei tate pawh an awm nawk thin bawk.
Keiniho daikilkara mite, a hmuna zu chhim pha ve lo, TV-a lo en pha ve tawkte pawh hian Olympics tiak mai tur chu kan ui vein, kan khua a har ve thin tho mai!
Tun tum Olympics hi kan ram (India)-ah chuan TV-ah Sports 18 HD channel chauhin a pe chhuak a, tah pawh chuan India tel ve na (item)-te chu uar taka special focus a pek thin avangin sports item dang, ramdangte’n skills/feats turu tak tak an show-na he’ng :-Gymnastics, Spring-board diving, Pole Vault, Synchronised Swimming etc.-te chu an tilang khat hle!
Tokyo Olympics 2020-ah kha chuan sports channel pali zetah an pechhuak a, hnianghnar takin kan en thei a nih kha. Tun tum Olympics 2024 chu chutiang en tur chuan Jio Cinema etc.-te kan subscribe tel a tul tlat! Mahse, electric current regular lohna hmunah chuan a buaithlak tho tho.
Paris Olympics 2024-a tun thlenga la chakber chu infiammi 594 zet thawhchhuaka tun Games-a athlete thawh hnem ber USA niin, he thu buatsaih lai thleng hian medal 103 a dawng tawh a, medal an la beisei theihte enin tu el rual loha chetha ber ni ngei tura ngaih ngheh niin, a dawttu China kutah medal 73 a lut ve tawh bawk.
A thlengtu (a chawngpu) France chuan palina dinhmun hauh mekin medal 54 a dawng mek bawk.
Kan ram India chu rank 64-na ni pha vein, medal panga chu kan dawng ve tawh a, tan lak nasat a ngai!
Sports department-ho hian kan thalaite talent nei tha tak tak la inthup si te hi zawngchhuak a, pholang a, sports huang chhunga chherchhuak turin i bei fan fan ang u.
Tarlan tawh angin, naktuk, sunday tlai thlenga games la khel turte en hian USA chuan item tinah a la tel(participate) vek chuan rank 1st chu a hauh tho tho hmel.
Modern Olympics awm tan tirh (1896) atanga vawiin thlenga Olympics history-a la tithaber/chakber ni reng chu USA hi niin, vawi 16 (tuna mi hi la chhiar tel loin) zet overall champion a lo ni tawh a ni.
Olympics St. Louis, USA 1904-ah khan medal 245 a dawng a, chumi record chu vawiin ni thleng hian tu ram mahin an la um pha lo!
A dawttu chu USSR niin, Olympics-ah hian vawiruk lai overall champion a lo ni ve tawh a, 1980 Moscow Olympics-ah khan medal 195 ngawt a dawng.
Khawvela ram ropuiberte pahnih USA leh USSR-te kha politics-ah an iner em em thin a, a lang a changin ralthuam chelekin indo lo mah se a ruktein ralthuam turu tak tak an inchhekk hawlsiak reng a, chu chu khawvelin ‘Cold War’ tia kan hriat lar em em thin kha a ni. Hemi ralthuam inchhekkhawlsiakna hi ram changkang dangte paw’n an rawn tih (copy) ve zel avangin UNO chuan a ngaimawh hle a, Strategic Arms Limitation Talks(SALT) a din phah hial a nih kha.
USA leh USSR in Cold War-na chuan Olympic Games chhungah pawh chi a rawn tuh lut tel nasa hle a, a rawn ti-politics zo ta vek a! Hemi ram pahnihte’n Olympics an thlen (host) chang pawhin an in boycott siak/chhawk tlut tlut thin a; ram dangin Olympics an host ve leh an tel ve ve lawi si thung a, iner tak chunga an han inel mai chu an hmuhnawm thin chur chur hle a nih kha!
1990-1992 bawr vel khan ram ropui tak mai USSR chuan politics a lem sual (hak) chiam avangin an ram chu a keh chhe darh ta vek mai a, chu ngei mai chuan an Olympics career tha tak mai chu a nghawng chhe hneh rem rem hle mai le!
An infiammite 1992 Barcelona Olympics-a champion tura an insingsat nasat lai taka an ram ropui tak a kehsawm ta vek mai khan an rilru a thawng nain, a ti-chi-ai em em a, an kun tlawk tlawk mai a nih kha!
An ram politician-ho chu innghirngho mah se an athlete rualho chuan 1992 Olympics-ah tal la insuihkhawma la khelhtlan zai an la rel thei a, International Olympics Committee (IOC) hnenah an dil a, IOC chuan CIS (Communist Indepentdent States) tih hming puttirin Olympics 1992-a tanho chu a lo remtihsak a; an han titha khawp mai lehnghal a, medal 112 zet dawngin, an ramin harsatna lian lutuk tawk mah se an la champion tho tho!
USA thangtlawm lutukin a hachang a thial nasa mai! Olympics lehpek 1996 chu USA-in a thleng (host) ve leh a, a champion ve nghal. Chuta tanga vawiin thleng hian (2008 China tih loh chu) USA hi an la champion chho char char a ni. Olympics Paris 2024-ah pawh hian champion turin han ngai phawt ila.
USSR kehdarh zingah hian Russia hi a la changkang/lian ber a, mahse, 2024 Olympics-ah hian Russia hmingin an infiammite an tel thei lo tlat! An thenawm ram Ukraine an run kal zel vang a ni.
IOC chuan special consideration pein Individual Neutral Athletes (INAs) tih hming puttirin Games hmachhawn tura tling Russian athlete-te chu a teltir ve a, mahse, an medal dawnte chu tun Olympics medals tally-ah hian a chuang ve lo.
IOC hian Russia hi 2020 Tokyo Olympics-ah pawh khan ROC tih hming puttirin a lo teltir tawh bawk avangin ramdangte chuan IOC hian Russia hi USSR a nih lai atang tawh khan a duhsak bik reng reng tiin an vui thu an sawi chiam thin.
Olympics football (men) final chu nizan khan a thlengtu France leh Spain-in an khel a, he thu kan chhut lai hian a chak zawk hriat hman a ni lo.
Women football final erawh vawiin, Inrinni hian USA leh Brazil-in an khel ve thung ang.
Lo dam ula, Los Agelese 2028-ah inhmuh leh theuh kan tum dawn nia…