Daily Newspaper

3rd round lut Osaka & Muguruza

9

Tokyo Olympic Games hmeichhe tennis singles khelh mekah nimin khan women’s draw-a ranking nei sang ber ni mek second seed Naomi Osaka leh Grand Slam-a vawihnih champion tawh Garbine Muguruza-te’n an tumpui ve ve hnehin round thumna an lut.

Japanese Osaka hian Tokyo Olympics women’s singles third round lut turin Switzerland nula Viktorija Golubic lakah minute 65 chhungin 6-3 6-2 hnehna awlsam a sualchhuak a, world number one Ashleigh Barty a tlak fel tawh avangin tualchhung nula Osaka hi gold medal awrh tura rinkai a ni.

Quarter-final luh inchuh match pakhatah Osaka hian Marketa Vondrousova a tum leh dawn a, Vondrousova hian second round inkhel dangah 6-1 6-2-in Mihaela Buzarnescu a sawp ve bawk.

Spain tana inlan Muguruza pawhin harsatna tawk loin round three a lut a, minute 61 lek chhungin China aiawh Wang Qiang chu 6-3 6-0-in a nawp.

Tuntum Olympic hmeichhe tennis-a player hriat hlawh dang French Open runner-up Anastasia Pavlyuchenkova pawhin kumin hian Russian Olympic Committee hming-in a khel a, minute 54 lek chhungin Germany player Anna-Lena Friedsam lakah 6-1 6-1 hnehna a sualchhuak.

Mipa lamah world number one Novak Djoko-vic chuan Bolivia player Hugo Dellien laka 6-2 6-2 hnehna changin second round-ah Germany player Jan-Lennard Struff a tum leh dawn a; hetih lai hian Germany star Alexander Zverev pawhin men’s singles-ah hnehna nena bul tanin, Colombia aiawh Daniel Elahi Galan chu 6-2 6-2-in a hneh ve tawh bawk.

Great Britain tana inlan Jamie Murray leh Neal Skupski chuan men’s doubles second round an paltlang zo lo a, 6-3 6-4-in Japanese pair Kei Nishikori leh Ben McLachlan-te’n an hnawtchhuak.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy