4-lane sialnaa leivung paih dan tur rel
NHIDCL-in Kolasib district huamchhunga four lane kawngpui tur a laih mekna hmuna thing senghawi leh leivung paih danah bawrhsap Robert C Lalhmangaiha kaihhruaiin Ningani khan thutkhawm a ni.
Bawrhsap chuan kawngpui sial mekah Forest department thing kihin electric Line a tichhia a, hemi avanga Vairengte Sub-Division huamchhunga ni thum chhung power supply a awm loh phah chu pawi a tih thu a sawi. Hetiang thil a thlen nawn tawh lohnan fimkhur taka hna thawh a tul tih a sawi bawk. Hmasawnna hna kan thawhin mipui nungphung a ti khaihlak tur a ni lo tih hre turin a kaihhnawih department leh NHIDCL leh an contractor-te a chah.
Forests hotute sawi danin, four lane kawng sial mekah kumin June thla tir atangin thingkung senghawi hna an tan a, package 3-ah 73% an zo tawh a, package 4-ah 77% an zo tawh. Package 5 leh 6 ah chuan an zo deuhthaw tawh a ni
Leivung paih danah bawrhsap chuan tuihna tichhe lo zawnga hma lak a pawimawh thu NHIDCL leh an contractor-te a hrilh a. Kawngpui laihna leivung paih avanga environment-in a tawrh loh dan ngaihtuah reng tur leh, kawngpui laihin a paltlang khawtlang hruaitute nen enhoa, leivung paih dan ruahmanna tha zawk siam thin turin a hrilh. Mimal rama leivung paih dawnin ram neitute nen inberawn tura tih a ni bawk.
4-lane sialnaa leivung paih dan tur rel
