900-goal club zawm thar Messi

900-goal club zawm thar Messi
Mipa player zinga club leh ram tan belhkhawma goal 900 thun tling awmchhun ni reng thin Cristiano Ronaldo chu a mal lutuk dawn ta lo a, Nilaini khan Inter Miami tan goal khat khung lehin a career-ah mellung thar a phun belh a, goal 900 a khawl tling ve ta nge nge e.
Chase Stadium, Fort Lauderdale, Florida, USA-a CONCACAF Champions Cup round of 16 second leg inkhelah Argentine hian Nashville SC laka Miami hmahruaina leh a mellung thar phunna goal ni nghal khung bawk mah se an mikhualte hian an siphurh sutin, team pahnih hi 1-1-in an inhnehtawk a, first leg-a goal awm loa an lo inthathen tawh avangin away-goal nei zo ve ta lo Inter Miami hian quarter-final an lut zo ta lo a ni.
A team tana zan lungngaihthlakah an captain Messi chuan mimalin lawman tur a nei leh bik a! A career-a goal 900 puitlin turin match 1,142 lek a mamawh a; Portuguese superstar Ronaldo khan heti zat goal thun tling turin game 1,236 a mamawh thung.
September 2024 khan kum 39 mi a nih lain Ronaldo khan 900 a thun tling a; Messi hi kumin June thlaa kum 39 tling chho chauh tur a ni.
Messi goal zatve aia tam hi kum 20 dawn a khelh tawhna FC Barcelona thuam a inbel chhunga a tihluh niin, kum 2023-ah Inter Miami in 2023 zawmin, a contract pangngai chu season liamta tawp rual khan a zo tawh a, kum 2028 thleng awh tur inremna thar a ziak fel tawh a ni.
Brazilian legend Pele kha a career-a goal 1,000 chuang thun tling inti ni mah se official-a a goal thun belhkhawm chu goal 800 tling lo deuh a ni thung.
A career-a mellung thar phun thulh thei lo Messi hian La Liga top scorer lawman Pichichi trophy an tih chu tum riat ngawt dawng tlingin, La Liga Best Player award vawi ruk, Ballon d’Or trophy pariat, Best FIFA Men’s Player chawimawina vawi thum, UEFA Men’s Player of the Year title pathum leh FIFA World Cup Golden Ball pahnih a dawng tawh a, Argentina Player of the Year atan tum 15 tehreng thlan a ni tawh bawk.
Messi hian club leh ram tan belhkhawmin trophy 47 a la tling tawh a, chu’ng zingah chuan Argentina tana 2022 World Cup a lak leh season liamtaa Inter Miami tana MLS title a lak kha telin, men’s football history-a player hlawhtling ber a ni chiang hle a; kan hma lawk United States, Canada leh Mexico-te inthlentawm tur Fifa World Cup-ah hian Argentina captain banhren a rawn hren leh ngei rin ngheh tlat a la ni cheu bawk!