Daily Newspaper

A cancer-in zual lam a pan avangin AGT atangin Nightbirde a chhuak

11

America’s Got Talent (AGT) audition-ah inlanin, a awm mawi danglam tak avangin live round a kaltlang nghal turin golden buzzer a dawng a, a chanchin lungchhiahthlak tak mai avangin lainat a hlawh zui hle a, AGT live round-ah pawh tel ngei a tum thu a sawi tawh nain Nightbirde chu a cancer-in zual lam a pan avanga inenkawl a tul tak avangin AGT atangin a chhuak ta.

Nightbirde, a hming tak Jane Marczewski hian Instagram-ah a thutlukna hi puangin, amah ngainatute chungah an support-na zawng zawngah lawmthu a sawi nghal a, “Ka audition hnuah khan ka hriselna a tlahniam lehzual a, cancer nena inbeihnaah hian ka thahrui leh ngaihtuahna zawng zawng hman a tul si a ni. Tun season-ah hian AGT-ah ka tel chhunzawm thei dawn ta lo tih puan a ngai ta hi ka lungchhe tak zet a ni. Hringnunah hian a phu ngawih ngawih te hian chawlhna an hmu kher lo- hei chu kan hriat sa vek tawh a nih kha. Min support-na zawng zawngah lawmthu ka sawi a, ka tan a hlu tak zet a ni. Min hre reng ula, ka tha leh thuai ang. Thurochhiah lam ka buaipui lo va, ka hmalam hun atan ka inruahman zawk a ni. Ka chauh viau nain beiseina chu ka la nei e,” a ti.

June ni 8-a AGT-a a inlan tumin Nightbirde hian a hlaphuah ‘Its Okay’ tih hla a sa a, a nuna hun hnuhnung lam kum khat chhung a phuahna a nih thu a sawi a, hei hi show judge ten an zawh belh zelnaah a chuap, hnungzang ruh leh thin a cancer thu a sawi chhuak ta a ni. Mahse, Nightbirde hi a natna te hian amah a bawih lo a, “Ka chunga thil tha lo thleng te ai hian keimah hi ka pawimawh zawk a ni,” tiin dam leh theihna chance 2% chauh a neih thu an hrilh pawh chu, “Zero pawh a nih loh chu,” tiin chance chhete a neih pawhin a tichak zawk a, a êng zawnga a thil thlir thiamna chuan khawvel a hneh a ni ber mai.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy