A chung berah Arsenal an kir

February 18, Inrinni zan khan English Premier League 2023 khelh chhunzawm a ni a. Villa Park ah vanneihthlak taka hnehna chang Arsenal in Manchester City chak zawh loh an chhawr tangkai a. Gunners hian point hniha hmahruaiin table chung berah an kir leh nghal. Inkhel dangah Liverpool an chak laiin, Chelsea an tlawm thung.
Arsenal an chak ve leh ta
Tunhnaia khel tha lo, game thum chhung ngawt an chak theih loh zawn vanga an hmahruaina hloh hman hial Arsenal chu Aston Villa hmachhawn turin Villa Park-ah an lenglut. Chak mamawh Gunners hi tumhnih ngawt hnufual zawka an tan hnuin tha zetin an thochhuak a, hun tawp tawpa dawn hnih an thun hmangin hnehna hlu tak an chang.
Villa Park-a lenglut Arsenal hian bul an tang tha lova, goal an chhuah hma hle, Inkhel tan atanga minute 5-na lekah an defending that loh hremin Aston Villa tan Ollie Watkins chuan tha zetin a pet goal a, hmahruaina goal a thun nghal. Hma takah goal an chhuah vangin Arsenal lakah rinhlelhna lian tak a awm nghal a. Point an hloh leh nge nge tura ngaih an ni hman. Hma taka goal an chhuah hi chak tura fuih phurtu tha tak a ni ta hlauh thung.
Champion chaka tuihal Arsenal hian na takin an khingpuite an nawr let nghal a, Eddie Nketiah chuan goal a thun nghal teuh hle a, Villa a rinawmna thu tiam thar Tyrone Mings chuan an team a chhanhim hman hlauh. Hemi hnu lawk hian Arsenal in goal an thun ta nge nge. Season kal meka khel tha tluang tak Bukayo Saka chuan a hun tha neih a hlah lova, minute 16-naah chiang zetin a pet goal a, an si phurh a sut.
Goal khat ve ve an thun hnuin inkhel a hmuhnawm zual sauh a. Mualneitu in goal an thun hmasa leh. Minute 31-naah Philippe Coutinho si nghak Aaron Ramsdale din loh lamah tha zetin a pet goal a, hma an hruai nawn lehna goal a thun. Chawlhlawk hmain goal dang a luh belh thei tawh lova, mualneitu Aston Villa in 2-1 a hmahruai chungin chawlhlawk an hmang.
Chawlhlawk hnu lamah ropui zawkin Arsenal an inlan a, goal thum ngawt an thun. Short corner chhawr tangkaiin defender Oleksandr Zinchenko chuan minute 61 naah tha zetin a pet goal a, an si phurh a sut. Goal hnih ve ve an thun hnuin goal dang a luh belh lawk thei lo. An inhnehtawk ngei tura ngaih a nih tawh laiin hun pek belhah Arsenal in goal hnih ngawt an thun ta thung.
Minute 90+3-ah midfielder Jorginho chuan kawh zetin cross bar a pet per dawp. He ball kal let leh hian Villa si nghak Emiliano Martínez hnung lam a per a, goal ah a per hlauh. Martinez own-goal hmangin hma an hruai let a, chak theihna hun tha tak an nei. Villa in an si phurh sut an tum luatah an chesual a, goal an chhuah belh. Villa hian hun tawp dawn tepah corner an hmu a, corner atanga tauh luh hlauh beiseiin si nghak Martinez chu Arsenal box chhungah a awm. Arsenal hian tha takin ball an tauh chhuak a, fuh zetin an khingpuite an nawr tlang a. Bench atanga lut Gabriel Martinelli chuan minute 90’+8-ah awlsam zetin a pet goal a, an chakna a nem nghet. Hun tawp thlengin goal dang a luh belh tawh lova, Arsenal chuan Villa Park-ah ropui taka hnehna changin, point thum hlu tak an hmu a, hmahruaitu Manchester City chu point thumin an lehpel lailawk.
Forrest in City an chelh
Arsenal in ropui taka Aston Villa an hneh lai hian hmahruaitu Manchester City chuan an hmahruaina an humhim zo lova, Nottingham Forrest nen 1-1 a inhnehtawkin, an hmahruaina an hloh zui leh nghal.
City Ground a lenglut City hian an khel chhe lo viau a, goal erawh an thun thei mai bik lo thung. Goal thun theihna hun tha tak an hlah hnuin minute 41-naah Bernardo Silva chuan Jack Grealish ball pek tha tak chu tha zetin a pet goal a, hmahruaina goal a thun ta nge nge.
Chawlhlawk hnu lamah pawh City hi an khel tha chhunzawm zel a, goal thun theihna hun tha nei bawk mah se si nghak che tha tak Keylor Navas an paltlang thei lo. Navas hian Aymeric Laporte tauh hlauhawm tak chu tha zetin a dang a, City hun tha neih dang pawh a tihthlawnsak bawk. EPL top-scorer ni mek Erling Haaland pawhin goal thun theihna hun tha nei bawk mahse a tiha mawi loin a hun tha neih a hlah tlat thung a, hnai tak atangin cross bar a pet per dawp.
City hian goal an thun belh theih loh an tuar a, hun tawp dawn tepah goal an chhuah. Mualneitu Nottingham Forrest hian fuh zetin an khingpuite an nawr tlang a. Minute 84-naah Morgan Gibbs-White siamsak tha zet chu Chris Wood chuan awlsam zetin a pet goal a, an si phurh a sut. He goal hian champion lai City a tihrilhhai viau a, chak an mamawhzia hriain goal thun belh ngei tumin thapui an chhuah zui nghal. Hun tawp thlengin goal an thun thei tawh lo thung a, 13-naa awm mek Nottingham Forrest lakah uiawm takin point hnih an hloh zui ta a ni.
City hian nilai zan khan 3-1 a hmahruaitu Arsenal hnehin, table-ah hmahruaitu thar an ni chauh a. Ni thum chauh hmahruaitu an nih hnuin hma an hruaina an hloh zui leh nghal a, pahnihnaah an tla hniam zui leh nghal zat. Nottingham Forrest lakah uiawm taka an chak zo lova, point hnih an hloh ringawt chu pawm thiam theih a nih loh thu City defender Kyle Walker chuan a sawi a. Hmahruai chhunzawm tura chak an mamawh em em laia an chak zo lo chu an tuar zui viau Walkers hian a ring tel bawk.
EPL season kal mekah City hian vawi 24 khelin, point 52 an hmu a, pahnihnaah an awm mek. An mahni aia khel tlem zawk Arsenal lakah point hnihin an hniam zawk mek bawk.