RK Dawla
Mb 9366095658
1. May thla tawp lam kan thleng ta. Ruahtui kan dawng pangngai chho tan a. Thil tiak phun hun a intan a, thlai kung bul phun a la hun nual bawk. Monsoon season a intan kan ti thei ang. Mizoram sik leh sa leh agricultural system thununtu lian ber, monsoon ruahtui, thla 5 chhung vel kan mikhual chho leh dawn a ni. Thli, rial leh têk lam a ziaawm chhoh a beiseiawm a, kuthnathawktute hnathawh hun zualpui (peak working season) kan lût chho tan tiin kan sawi thei bawk ang chu.
2. Phai lam atangin polypot-a khawi nun thei tiak kan chawlût a, kan intihhmuh chho viau. Hêng polypot-te hi lei ban tak an ni tlangpui a. Huana han phun chiah hian a lei ban lutuk vangin a zung tawih leh thang tha zui lawk lo a awm duh hle. Chuvangin, kan phun hma-in hmawlh zumin pot kha hmun 3 velah vit kua/keh-in, chumi keh/kua karah chuan meihawl dip emaw balu thun thin a tha. Hei hian pot lei sak ban tlat tur kha a vêng a, thlai an than that zui phah duh bik a ni. Tin, thei tiakte hi an hnah mal kawlh vek a, a kuang pawh chinai diak emaw thukvut chawh diaka zût thlap a tha ber. Hei hian thei tiakin natna leh eichhetu rannung a rawn chhawm tur tam tak a pumpelhtir a ni. Nursery-ah vaiho hian chemical pesticide nen an rawn enkawl nasa dawn tih a rin theih a, chuvangin kan khawih leh thiarvelnaah pawh fimkhur phawt a tha-in a rinawm bawk.
3. Thlai/thei kan phun thar reng rengin, nisa rum lutuk laka dâltu engemaw kan siamsak nghal hi a pawimawh hle a. Enchhinna ka neih tawh-ah chuan, hetianga shade siamsak nghal thil phun tharte hi chu natna leh rannung lakah a him bik hle. A theih phei chuan, shadenet them hmanga a chung zarsak hi duhthusâm a ni. Shadenet kher a remchan loh pawhin parcel chhia leh thawmhnaw chhia pawh a tha êm êm. Tin, thlai phun thar bulah hian hnim veng turin buara, parcel leh thawnhnaw ilo mulch nghal hi a tha hle. Hmun thenkhatah chuan heng mulch-na hmanruate hi tlumpiin an ei duh hle a. Mahsela, tlumpite hian thlai nung lai chu an khawih lo tlangpui. Thlaiin fungal natna engemaw a tawrh vanga a tissue a ro-ai a nih chauhin, tlumpi hian thlai an ei thin tlangpui a. Mahsela, tlumpi sen chi an awm ve thin a, hei erawh thlai nung lai ei thintu an ni thung. Mahsela an tam lo tlangpui, kan ramah chuan. Tin, heng tlumpi sen chite hian Carbohydrates tamna (bal, fû, bahra etc) an duh bik bawk.
4. Thei tiak phun tharte hi a kungbul lamah hian khau leh beetle thenkhatin (sazu pawh) seh chhum an ching thin. Man to taka thei tiak kan leite an nih vangin, hautak hlek mah se, him taka kan phun nun theih kha a pawimawh a. Chutiang atân chuan, mineral water bottle hmanga a kung bul tuam a awlsam. Chhemthei angin plastic bottle kha kan tan a, a chhungah thei tiak kan hnawhlût tlang a. Tichuan, rannung kam hlei lakah an him deuh. Thlai a lo nun that a, an lo thanlen tawh chuan, plastic bottle kha bakcheh emaw chemte hmanga cheh thler a, lâkchhuah leh mai theih a ni bawk. Tin, thei tiak kan phun dawnin, a kung puitling size tlangpui kha mitthla hmasa-in, a bi inkar hlatzawng hisâp thin tur a ni. Chubâkah, thlasik ni a her hlek huna thlai kung bukin ni eng an inhliah theih loh dan tur kha chhût ve hlek a tha bawk. Nipui leh fur lai hi chuan, Ni hi khawchhak lai takah chhuakin khawthlang lai takah a tla leh thin a. Thlasikah erawh a chhim her hlek ta thin a, Thlaiin ni eng an khawpkham loh hun season chu thlasik lai a ni tlangpui a, hei hi kan thlai phun rualin ngaihtuahnaah awm nghal sela, thil tha tak a ni bawk.