RK Dawla
Mb 9366095658
June thla tâwp lam kan thleng leh ta a. Central Mizoram lamah chuan a khât tâwka ruah a sur nghek tih loh chu, nikir khawchêng ang chi, chhuna lo/huan lam hna thawh theih loh nileng ang chi a la thleng mang miah lova. Chîk zawka kan sik leh sa awmdan kan thlir chuan, hriatthiam mai har tak tak a awm ta nual mai. Kan sik leh mila leilung enkawl dan duang thiam tur pawhin, a sik leh sa ber kha a mumal lutuk lo tlat thin a, hei hian nakin lokal lehzel tur atân inbuatsaih pawh a tiharsa ang reng viau. Engpawhnise, Monsoon season tâwp lamah ruahtui kan dawng regular deuh mahna le…
Thlai ching tur chuan thil bulthut pathum pawimawh a awm a – Ni êng, ruahtui/hnâwng leh leilung te. Heng thil pathumte hi kumtluanin an pawimawh a. Thlai thar hlawk leh hriselna kawngah te, inbuatsaih leh enkawl zui kawngah pawh an pawimawh ber zel a ni. Leilung azirin thlai chin tur deuh bik a awm a, ni eng dawn tam dan azir pawhin thlai a hrang thei a, ruahtui hmuh dan leh tuipêk theih dan azirin thlai a danglam nasa thei hle bawk. Mizoten kan than-hnan nia lang, kan zia pakhat, hnawksak êm êm chu, kan hmanhmawh thin hi a ni. A rah seng kan hmanhmawh a, hlawhtlin thuai kan duh a, kan teirei peih lo thin. Hei vang hian kan tu leh fate chan tur leh awmdan tur dâwn lo lêkin kan che fo thin. Kan zia pakhat, tha lo leh êm êm chu kan inzir peih lo hi a ni bawk. Chhungkaw châwm nâna huan/lo nei thin tam tak hian, kan mamawh tur ang information pawh notebook-ah kan chhinchhiah thlip thlep peih lo tlangpui thin. Kan inzir leh chîk peih loh avâng hian buai lohna tur tam takah kan buai a, sumdawng tam takin min bum phah thin bawk. Thlai damdawi, thlai tiak leh leitha ilo kan lei huai ang hû hian, a enkawl zuina lam knowledge & technique hriat tum lamah kan tuan a tha lo hle. Kan tum dan aiin thil nihdan kha a pawimawh a, chu chu kan hriatthiam hmasak a lukhâwng fo thin.
‘Mi ram anga rem’ ni ve lovah, mi thlai chin ang tho kan ching a, keimahni tualto ngaihhlut nachâng hre lovin, state dang leh foreign thlaiin hlawhtlin kan tum a, a harsa-in buaithlak tam tak a awm thin. Tuteemaw inti-thlarau-mi deuhin, kan ramah chuan engpawh a tha thei an ti fo thin. Hetia ngaih mai chuan, a dik hmel viau. Mahsela, quality leh area inang rau rauah state dang/ram dang kan tluk lo tlangpui zel. Chhura sekibuhchhuak ang deuh a, awlsam taka hlawhtlin mai kan tum fo thin a. Kan ramah chuan ram rem kan ngah lova, awihpang kan ngah zawk a. Hei hi hmang thiam tur chuan, mi tihdan nazawng entawn ngawt lovin, kan ram awih tlan leh sik leh sa mil keimahni ngeiin kan duan chhuah a ngai. Kan rama awmsa thlaite leh tualto theite pawh kan vawrh-lar thiam a pawimawh êm êm bawk. Kan rama thei kan neihsate hi a hlutna zawng chhuakin vawrhlar ngat ila chuan, awlsam tê-in kan hlawhtling ngei ang. Foreign thlai aiin zuva leh natna lakah an chhel filawr lak a, leilung leh sik leh sa an mil nghal bawk nen…Kerala leh Tamil Nadu chuan, an ramhnuaia tualto Cardamom an vawrhlar a, an hlawkpui êm êm. Kerala phei chuan, an tualto Cardamom Njallani variety phei chu an champion-pui takzet a ni. Mizoram hian, kan ramhnuai theite leh pi leh pu atanga kan thlai chin thinte kan promote thiam hun hunah, khawvel hriat a hlawh takzet ang tih hi a rinawm tlat a ni.