RK Dawla
Mb 9366095658
1. November thla tawp kan thleng leh ta reng mai a. Thlasik boruak kan lût fel a, khua a rovin boruak a vawt nuam tawh hle. Kan thlai tam berte chuan hnâwng an tlachham leh tan tawh a. Tropical environment-ah chuan fur ruahtui tamin leilung a tihnâwng chiau lutuk vên leh thál khawro-in leilung a ur khawro lutuk tur vên hi kan hna bulthut chu a ni mai a. Leilung chunglanga hnâwng awm ang angte pawh, thlasik boruak ro hian a hîp hul chak a, thlaiin hnâwng an tlachham sam êm êm. Ruahtuiin lei chunglang a lên bo tluk bawkin thlasik leh thâl khawrovin direct-a leilung a em hi a pawi a. Hnâwng a hîp bo mai ni lovin, leitha kalkual (nutrient cycling) awmtirtu lei hrik tangkai tam tak kha nisa hian a em ro a, a tiriral nasa êm êm thin. Hei vang hian, thlasik laia leilung khuhtu tur thilto ruang emaw hnim hring emaw Mizoram farmer-te hian kan mamawh hle – a bikin thlai kumhlun chingtu farmer zawng zawngte hian.
2. |hal laia leilung hnâwnna vawn kawngah hian Mizo farmer-te hi kan la harhchhuak lo êm êm a. Thâl laia thlai tâm leh thi ro tam tak pawh hi, leilungin hnâwnna a tlâkchham vanga lo thleng a ni tlangpui thin. Leilungin hnâwnna a tlâkchham chuan, thlaiin stress an la hma-in an la nâ zual ta thin a, tichuan chutianga thlaiin tawrhna a neih mêk lai chuan hri eng engemaw a la awlsam ta bik a. Fur ruahtui lo thleng mah sela, kha leh chen thal khawro lo tuar hrep tawh thlaite kha tlaikhawhnu-a hnâwng khan a chhandam zo tawh lo fo thin. Khawvel lo lum chho zel bawk nên, kan hmabâk hi a êng fahran lo a ni. Hetih laiin farmer tam takte chuan, hmun zim zawkah hneh zawka thlai enkawl leh thal tuipêk dan ngaihtuahsak lam ai chuan, risk tak meuh meuha a tam thei ang ber thlai phun uar kha kan la tuipui mauh mai a. Kan la tisual chho hle dawn a ni. Tunhnai kum 10 chhunga Mizoram lum chakzawng hi 2.5% vel niin chhût a ni a, kum 10 dang liam leh ta sela chuan, vawiina kan plantation tam zawkte hi chuan mual min liamsan ngei dawn a ang ta khawp mai.
3. Climate smart Agri kan tuipui chhoh a hun takzet a. Hemi atân hian leilung enkawl (Soil management) lam kan uar chhoh a, kan thiam a tul hle. Thlai ngar ngar focus lovin, leilung zawk kha focus hmasak a hlu chho dawn a nih chu. Climate change vanga kan hmabâk thil lo thleng mêk hmufiah thiam leh chumi mil tura kan chêtlâkna kan inher rem a tul hle. Kumin hi La Nina a ni a, ruahtui kan dawng tamin kan dawng rei hlauh a. Kum dangah a tam zawkah chuan khaw khêng (El Nino) kan la hmachhawn leh fo dawn a. Kum khat khawkheng ringawt pawh kan thlai kumhlun tam takin a chhiatpui a nih chuan, kum 2/3 a zawna khua a khen vaih chuan, mangchhe râpthlâk tak a thleng ngei ang. Hei vang hian, kan ramngaw neihsate suat buaih buaih lovin, a tlêm thei ang ber vah che reu a, kan vah chereu ang ang pawh awmze fumfe nei taka kan enkawl thiam a tul chho dawn.
4. Mi thenkhat chuan Tlangram lo neihin ramngaw a tihchhiat nasat thu leh pumpelh dan kawng kan zawn vat a tul thu an sawi fo thin. Mahsela, hei hi a dik fihlim chiah lo deuh. Kumkhat atâna kan lo neih hi chuan, kan neih kumah ecosystem kha va tichhe mah ila, a kum leh atangin kan inrawlh zui tawh lova, khuarel kalphung pangngaiin ngaw a indin thar chho leh mai thin. Huan lo ram atâna kan hmunhma enkawl erawh, thlai chi 2/1 chauh kan ching a, a bâk kan suat reng avangin ecosystem insiam thar leh thei lovin kan sawp reng a, hei hi a pawi êm êm zawk a ni. Kan hâl kum tin lo a ni mai a, nimahsela khawvel lum zel tur venna, leia carbon inchhêk (Carbon sequestration) lamah kan kumhlun huante hi a pachhe êm êm mêk a ni tih kan hriatchian a tul bawk. Chutih laiin kumkhat lo neih pawh, a technology a upa tawh a, a hlâwk lutuk lo bawk nên, a thlâk dan tur mumal kan zawn a hun hle bawk. Climate change hian kan rin aiin kumkhat lo neih pawh a rawn nghawng nasa zel dawn si a.