RK Dawla
Mb 9366095658
lo thleng leh ta. Hmun thenkhatah chuan Favang lamah lo vâtin, tun lai hian an kângvar a. January chho vela vât erawh March thla tirah kan hâl tlangpui thung. Engpawhnise, kumin chu sawrkar thar kan neih hian sawhthing hmun tur vât kan tam phah viau niin a lang a. Eizawn nâna kuthnathawk ni lêm lo, khawpui leh thingtlanga tlema khawsa thei deuhte sawhthing hmun neih uar kumah puang ila, a dik viau âwm e. Vawilehkhata sum ruh tawk hi chu Mizorama kan thupui ber pakhat hi a ni ve hrim hrim a… Sawrkar hmalakna hian a chhanchhuah tum ber kuthnathawktu rethei tak takte a chawi kâng zo lovang tih a hlauhawm khawp mai.
2. Sawhthing chungchangah hian thil tha lutuk lo kan intihhmuh chho mêk a. Chu chu damdawia chiah leh a hmun hlo tûr hmanga kah a ni. Damdawia chiah nân hian Ridomil (Systemic leh contact fungicide inkawp) an hmang tlangpui a. A hmun thlawh nân Di hlo kan tih mai, Non-selective herbicide chi khat, Glyphosate kan hmang uar tan viau mai a. Heng chemical hlauhawm tak takte hi kan nêl luatah kan tisual ang tih a hlauhawm deuhin a hriat. Tûr hmanga hahdam taka thar teuh tumna hi rei tak kalpui chi a ni lovang, kan Mizoram environment derthawng takah hian. Engpawhnise, fungicide (Ridomil, Sixer etc) hmanga sawwhthing kan chiah dawn chuan, sawhthing chi tur kha dah sâwng hmasa phawt ila. Chumi hnu-ah a chi tura zai leh damdawia chiah ni sela, a tha ber e.
3. Agri leh a kaihhnawih hovah sawrkar tharin hma lâkna a chhawp lian chho hi a ngaihnawmin a lawmawm hle mai a. A chhan chu farmer-te hian ngaihsak tak tak kan hlawh ngai lova, project siam nân, vote zawn nân leh infrastructure chhe-mi hmanga enkawl kan nihna hi a rei tawh khawp a. Hei vang hian kan khaw-hmuh a tawiin, kan ngaihtuahna pawhin hnam dangte rual a ban ve hlei thei lova. Hun remchang inhawng hmasa berah a theih dan dana dinchhuah ve kan tum hi a hriatthiamawm êm êm. Mahsela, farmer-te pawh hian thui tak kan thlir a ngai ve thin a. Chemical pesticide nen tam tak kan thar thei mai ang. Chutih laiin lo thar tam ta tak tak ila, buaipui tak tak tur leh man man taka ramdanga hralh tur chuan ORGANIC ngei a tul hmel tlat mai a. Hetah tak hian buai namên lovin kan buai thei a ni. Nikum lawka India thingpuife thawnchhuah an rawn thawnlêt leh chiam chhan pawh kha, thingpuiah khan Glyphosate zungzâm a tam lutuk vâng a nih kha. Ram changkang, ram hausa kan tihte hi ei leh in lamah an fimkhur êm êm a, an economy a ngheh tawh avangin keini ang bawrh bawrh hian an ei lo deuh a. Chuvangin, engpawh Mizoram hian kan buaipui dawn a nih chuan, thui tak ngaihtuahna i sêng thin ang u.
4. Chiahpuam leh smuggling hrawva hun hi ral sela, keimahni kutkawih ngeia kan chhungkua leh ram tungding turin tan la thar ila. Sawrkar pawhin a theihtawp a chhuah zel ang a, thuang hnihin theihtawp kan chhuah chuan kan ram a dam êm êm ang. An thil neih atanga an sum lâkluh dan dik lo nia langte hi hmusit ngam ila; Sunday kristian aiin weekdays kristian ngaisang ila, mi rethei ber pawhin sawrkarah beisei nei ngam tawh sela, kan ramah hian Pathian ram chu a takin lo thleng mawlh rawh se…