Youth Icon fans lamin an ‘Icon’ te thilpek pek an intihhmuh zel a. Tun tumah hian Top 3 dinhmun luah phak, Lalbiakkima Hnamte hun a inher chhuak ve ta.
Youth Icon thlanna neih zawh a ni tawh a, tunge Youth Icon atana thlan chhuah ni ta tih pawh inzawh nawn a ngai tawh kher lo. Chutih laiin, zai intihsiakna neih zawh fel vek a nih hnuah fans lam an intihsiak ve thung. An Icon theuhte thilpek hlu leh man to tak takin an um zui ruih ruih a. Tunah chuan Lalbiakkima Hnamte (BK-a) hun a rawn inher chhuak ve ta.
Nimin khan BK-a Fans Group tia invuahte hian LBS Suzuki showroom, Bawngkawnah, an Youth Icon hnenah Gixxer 250 (naked) an hlan. Bike man hi Rs 2,24,222 vel a ni.
BK-a Fans Group te’n hian banner siamin, “Lalbiakkima Hnamte (Aw Hmeltha) kan lo lawm a che, i aw mawi leh i sakhmel ngaihno bei tak vang hian i fans te hi a zunzamah dar tui ang kan luangral ta, i thilpek dawn hi i phu tak zet a, kan lawmpui takzet a che. I fante hian kan hmangaih em em che u BK chut but but pa,” tiin inziahna an tar chhuak a, he thu hi BK-a an chhiar chhuah tir nghe nghe.
BK-a Fans Group in bike an hlanna hunah hian Youth Icon Lalsangliana (Taitea), Dinhlua, Samsona, Kim Kima leh Ziona te’n an thianpa hi an tawiawm a ni.
A fans group-te’n BK-a bike lei sak
