A hluar zawngin corruption a kal mek
– Lalnunmawia Chuaungo
ZPM sawrkar hnuaiah corruption dona tur tih chak a nih loh mai bakah hna an inpek danah a hluar zawngin corruption a kal mek zawk tih Congress hruaitu Lalnunmawia Chuaungo chuan a sawi.
Zirtawpnia Congress Bhavan-a inkhawmah MPCC senior vice president Lalnunmawia Chuaungo chuan, ZPM chuan tawngka bakin corruption do a tum lo tih an thiltihin a tilang a, an sawrkar phat atanga an kal dan thlir chuan corruption tih kawnga duhtawka an sapatal theihnan kawng an sial tih a sawi.
ZPM sawrkar hnu lawkah Lokayukta dan an siam danglam nghal tih sawiin, “Congress sawrkar lai chuan sawrkar thuhnuaia awm lo Lokayukta chauh corruption case chhui thei a ni. Chief minister pawh chhui thei tur Lokayukta Act hi Congress sawrkar laiin kum 2015-a pass a ni. Chief minister Pu Lal Thanhawla hunlaiin Lokayukta chairperson ruat tura hma lak a ni a. Selection Committee member pakhatin duhdan hran a neih avangin a thutlukna siam mai theih lohin a awm. Chu chu MNF sawrkarin bawhzuiin Mizoram Lokayukta chairperson atana sawrkar hmasain a chhawpchhuah chu kum 2019 khan ruat a ni ta a ni,” a ti.
MLA inthlan dawnah Congress-in manifesto-ah Lokayukta thuam chak a dah bakah ZPM pawhin Lokayukta thuamchak tum tur thu dah siin, a ti thuanawp zawngin hma a la ta zawk tih MPCC hruaitu hian a sawi. Lokayukta Act 2015 hnuaiah sawrkar thuhnuaia awm ACB-in anmahni thuin corruption case chhui theihna a nei loa, Lokayukta-in ti tura a tih chauhin an tithei tih a sawi bawk.
“ACB-a post 25 Lokayukta-ah transfer tura thutlukna awm, pending-a sawrkar kalta in a dah chu tun thlengin tih hlawhtlin loh, pending-in a la awm a. Duh se chu ZPM sawrkar hian kar khat chhung lekin Lokayukta-ah a transfer thei. Mahse an sawrkar atanga kum khat hnuah pawh an ti duh chuang lo. An sawrkar hnu lawkah Mizoram Lokayukta dan tidanglam zawkin Lokayukta thuamchak lam niloin a tithuanawp zawng leh hna thawk tak tak thei lo tur zawngin an kal zui ta zawk a. Lokayukta chauhin corruption case chhui theih tura tih pawh an rawn ti dal ta a ni,” a ti.
Tunah chuan chief minister leh Home minister ten direct-a an control-na hnuai ami ACB leh Police pawh Lokayukta hriatpui lohin corruption case chhui thei turin an ti ta daih tih a sawi a ni.
Prevention of Corruption Act Section 17A phenah hmangin, state sawrkar phalna la hmasa lo chuan sawrkar hnathawk, minister leh CM-te Lokayukta hian a chhui thei tawh lo tih Lalnunmawia Chuaungo hian a sawi a. CM leh minister-te chhui ngai ni se, Lokayukta-in a chhui ngawt thei tawh loa, state sawrkar phalna a lak hmasak zel a ngai tawh a, Lokayukta hi state sawrkar peng pakhat ang chauhah an chhuah ta tih a sawi.
“CBI hnenah general consent kan pe ang an ti a. Chhuanlam an siam leh a. He sawrkar hian hmui chauhin corruption a do a, restricted tender nuaibo an ti a, an sawrkar chiah a, nuaibo ahnekin sawrkar hmasa hunlai aia hluarin an che tawh zawk. Tunhmaa kan la hriat ngai loh, work supervisor an ti a, work supervisor hi an duhsak zawngte contract hna pekna a ni. RTI-in kan zawt a, work supervisor tur hian qualification ngai a awm loa, experience ngai a awm lo. Sum leh pai, khawl adt. neih a ngai loa. Work supervisor tura qualification ngai awmchhun chu ZPM minister-ten an duhsak nih kha a ni mai. Chuvangin corruption hi a hluar zawngin a kal mek a ni,” MPCC senior vice president hian a ti.
A hluar zawngin corruption a kal mek – Lalnunmawia Chuaungo
