A hun ngaiah chinghnia a hrang

A hun ngaiah chinghnia a hrang
Sailulakah chinghnia a hrang a, sial an seh thin avangin sial vulhtute an buai hle. Se vengin an buai a, an inveng seng meuh lo.
Sailulak Sial Vulh Association president Lalramliana sawi danin, sial hi a ruang hmuh chin chu 13 a ni a, a ruang hmuh loh engemaw zat a awm bawk.
Sailulak-ah hian ramhnuai zau tak square kilometre 17 vela zau, ‘ram complex’ an nei a, chutah chuan khua atanga a hnai lai, square kilometre 2 vela zauah se vulhtute’n sial hi an khalhkhawm. Chinghniain an seh thin vangin, ven tumin July ni 11 vel atang khan an khalhkhawm a, mahse an inveng seng chuang lo.
“Kan khalhkhawm hnuah pawh chinghnia hian an rawn luhchilh tho a, square kilometre 2 vel a ni a, ven sen ngaihna pawh a awm lo a,” an president chuan a ti.
“Hetia dahkhawm reng theih hi a ni dawn lo a, chaw hian a daih reng dawn lo a, a zo thuai dawn a,” a ti a, mahse tunah chuan tih dan dang a awm loh avangin chawin a daih rei dawn lo tih hre chungin an dahkhawm tawp mai tih a sawi.
Sial hian hnim an pet a, hnim pet turin ramhnuaiah an tla thin. Chu chu chinghniain an lo seh a, kum dangah pawh chinghnia vang hian an lo buai tawh thin.
An president Lalramliana chuan fur ruah tui tlak lai, tun ang hun velah hian chinghnia hi an hrang thin tih a sawi a, Sailulak ramah nghal rual an luhin chinghnia hian an zui thin tih sawiin, May thlaah khan nghal rual hi an lut a, chinghnia an hrang zui tih a sawi.
“Fur lai hi an hran hun a ni kan ti mai a, furah pawh nilenga ruah a sur hi chuan ‘Vawiin chu an phil leh ngei ang,’ kan ti mai a,” a ti a, ruah a sur nilen ni hian sial an chan thin nia an hriat thu a sawi.
Chinghnia hi rual khat niin an hria a, mahse rual khat aia tam an nih an ring tawh. Se vulhtute hian chinghnia hi pahnih chu an hmu tawh a, chu bak chu hmuh an la nei lo.
Sailulak hi Khawchhaktuipui, |iau leh Zuva luite’n an karcheh a, ramngaw thatna hmun a ni. Sazuk leh sa dang pawh a tam a, sanghal pawh an awm. Chung chuan chinghnia hi a hip niin an hria a, kum laihawl velah nghal rual an lut a, chu chu chinghniain an zui thin tih chu an hriat dan a ni.
Vety department chungah an lawm a, “Vety department hian min ngaihsak a, tunah pawh kan harsatna hi min hriatpui a, theihtawp an chhuah,” an president chuan a ti.
Chinghniain a tihbuai avang hian, sial hi ven theiha an awm nan vety department hian nikum khan ran chaw tur hnim hmun an siamsak tih a sawi a, mahse a thang muang a, kuminah hnim chi dang an phunsak leh tih a sawi a, se vengtute hian sum leh pai pawhin vety department hian an pui tih a sawi bawk.