Kum 2020-a tennis khelh a chawlhsan hnuah chhungkuate din a, pasal fanau nena an kawi ve niai hnuah world number one hlui Caroline Woz-niacki chu kum 33 mi ni ve tawh chungin tennis khelmualah Thawhlehni khan kirlehin, Canadian Open first round-ah nuamsain hnehna a chang nghal.
Fa pahnih a hrin hnua tennis khawvel a luhchilh leh hnuah Denmark nu hian 6-2 6-2-in Montreal khuaah 115th-ranked qualifier Kimberly Birrell of Australia a sawp a, second round lamah 6-4 6-a Mayar Sherif hnehtu Wimbledon champion Marketa Vondrousova a tum leh ang.
2018 Australian Open title latu Wozniacki hian a career-ah WTA Tour-level title 30 hlawh-chhuak tling tawhin, WTA ranking-ah chawlh-kar 71 chhung number one dinhmun a luah tawh bawk a; hnehna nena khelmuala a kirleh boruak sawiin, ropui a tih thu leh Montreal-a inkhelh chu tunhma pawha a nuam tih thin a nih thu a sawi a, nu a nih hnua a hnehna hmasaber chu mak a tih thu leh a fate pawh tui takin an mu thei ang tih a tarlang tel.
Kumin June thla khan Dane hian 2023 US Open khelh leh a chak thu sawichhuakin, New York tournament-ah hian kum 2009 leh 2014 khan final a lo khel ve tawh a; Vogue chanchinbu hnena chu thu a sawi hnu lawk chuan August ni 28 atanga Flushing Mea-dows-a tan tur New York tournament atan organiser-te’n wildcard an hlan nghal nghe nghe.
Kum thum kaltaa Australian Open a hma-chhawn hnu lamah Woz-niacki hian competitive match a khel leh ta lo vang vang a; chutih chhung chuan a pasal NBA player hlui David Lee lakah June 2021 khan fanu Olivia hringin, October 2022-ah fapa James a hring zui leh.
Wozniacki tum leh tur Vondrousova tan Cana-da ram tournament hi SW19 final-a Ons Jabeur a hneh hnua inelna a hmachhawn leh vawi-khatna niin, Czech chuan mite’n a lakah beiseina an nghat lian tih sawi chung-in pressure awm thei phur zo turin theihtawp a chhuah tih a tarlang tel.
Dane hian second round-a a hmachhawn tur Vondrousova chu a tan fiahna hautak zawk a nih thu sawiin, “Wimble-don-ah awihawm loh khawpa thain a khel a, tumpui khirh tak a ni phawt dawn a, mahse, ka tan chak lo mah ila hloh tur a awm ve chuang lo,” tiin pressure tel loa a khelh theih bik tur thu leh eng pawh tawk se nuam ti taka khel mai tur a nih thu a sawichhuak.
A kir ruala chak nghal Wozniacki
