Union Berlin lakah an hmahruaina hloh hman zuai mah se Pathianni zan khan 4-2-a mualneitu VfL Wolfsburg sawp chungin Bayern Munich chuan Bundesliga table-a an hmahruaina an neikir leh thuai a, point khat bawkin Union lakah an chungnung chhunzawm leh.
Kingsley Coman chuan Davies leh Cancelo siamsak atangin a tir lam minute 14 chhungin mikhual goal hnih a tilut hman a; minute 19-ah Joshua Kimmich thawhrah atangin Thomas Muller chuan Munich club goal thumna a thawh ve leh.
Goal thum an chhuah hnu chawlh-lawk dawn tepah Jakub Kaminski chuan Wolfsburg siphurh pakhat sut thenin, second half tir lam minute 54-ah Kimmich hnawhchhuah a ni a; Bavarians hian darkar chanve chuang player 10-in khel mah se goal khat an khung belh a, goal khat an chhuah then leh bawk.
Bayern goal lina hi Pavard siamsak atanga minute 73-a Jamal Musiala tihluh niin, hun pangngai tawp hma minute 10 la awmah Mattias Svanberg chuan Wolfs-burg goal hnihna thawh ve leh bawk mah se a team tlawm tur a chhan zo lo.
Wolfsburg khan hun pekbelh minute 84-ah an goal thumna hlawhchhuakin an inngai hman a, mahse, Yannick Gerhardt goal tur intham vel laia Leon Goretzka laka Ridle Baku ‘foul’ chu referee-in a hmu a, Gerhardt goal tur hnawlsak a ni.
Red card hmanga Kimmich hnawh-chhuah a nih chhan kha Maximilian Arnold laka a ‘foul’ vang niin, a tlem zawk ni mah se Bundesliga defending champion-in an mikhualnaah point thum an hlawhchhuak zo a, an league match hnuhnung pathuma chak zo lo fai vek Munich club hian chak an lawm leh thei ta a ni.
Inrinni German Bundesliga inkhel pakhata 2-1-a Mainz hnehtu Union Berlin laka Bayern-in point khata hma an hruaifal laiin an kawtkaia point thawk-chhuak zo lo Wolfsburg erawh pasa-rihnaah an thu chhunzawm.