Daily Newspaper

A LO HER CHHUAK LEH DAWN TA

10

-Ramhluna Hnamte

Zo Kristian ten kan nghahhlelh em em Krismas chu he article ka ziah lai hian ni 12 lekin min la dang a nih hi. Naupan lai a Krismas thleng har kan tih theih teh reng nen, tunah chuan a thleng ta zung zung mai a nih ber hi. AIR Aizawl station atang pawhin Krismas hla an rawn ti chhuak tan leh tawh a, hmanni zing chu Roliana Ralte in ama irawm chhuak ngei, Krismas hla, amah ngeiin duh tak maia a sak , ‘En teh a lo her chhuak leh dawn ta, mitin tana hlimna tur chu…….’ a han ti vang vang mai ka han ngaithla chuan ka rilru a titharin ka lung a va han ti leng teh lul em! He Zo Krismas hla mawi tak mai hi zaithiam tam takin an sa a, an sa tha em em vek bawk. Mahse a phuahtu Roliana Ralte ngei maiin duh tak maia a han sak vang vang mai hi chuan lung a ti leng bik a, a satu a boruakah a cheng ang chiah hian a ngaithlatute pawh Krismas boruakah min chentir vawng vawng thei a nih thin hi mawle.

Mahse kumin 2020 Krismas zet chu Covid 19 hripui leng avangin kum danga Krismas kan hman thin dan angin kan hmang thei dawn ta lo a ni tih kan hre vek a. Hei hi Mizote Kristian kan nih hnua Krismas kan hman dan danglam tak, kan la tawn ngai reng reng loh, Krismas zaikhawm, Krismas tuka Biak ina inkhawm leh kohhran tam berten an tih ngei thin ruaitheh tel loa Krismas kan hman vawi khatna a ni mai awm mang e. Rambuai thim chhah lai ber pawh khan Krismas hi chu phalna lain kan zaikhawmin ruai te pawh kan theh hram hram thin hlawm a nih kha maw. Mahse tun tum zet chu zaikhawm leh ruaithehte chu hri inkaidarhna hmanraw tha ber berte an nih dawn avangin kan tawmim thap mai dawn niin a lang, a nghahhlelhawm dan a nghahhlelhawm si lo mang e!!

Naupang kan nih ve lai hun te kha chuan Krismas te hi kan nghakhlel em em thin kha a ni ngai a, chuvang chuan a lo thleng har kan ti thei hle thin a nih kha. Khang hun laia Krismas kan nghahhlelh em emna chhan ber chu kawrthar neih, Krismas ruai theh leh zaikhawm kha a ni ber mai. A hnam pum khan kan la rethei bawk a, kawrthar te kha naupang phei chuan Krismas dawna kan neih kha a ni mai a, sa lah chu Krismas ruaia kan ei kha kan sa ei chu a ni tlangpui leh deuh mai a. Vawk talh nikhuaah vawksa kan ei a, chu pawh a vulhtu/talhtu pawhin mahni chhungkuain a pumbilh theih loh a, thenawm khawvengte nen kan tlan a ni ber a. |henawm hnaia ramvachal deuh an awm chuan an sa kah min hleh ve zeuh changin sa kan ei leh a ni mai a. Sa ei hrim hrim kha a khat em mai a, hei vang ringawt pawh hian Krismas hun chu nghahhlelh loh theih a ni lo a lawm. Mahse tunah chuan khawpui leh thingtlangah pawh kan changkang tawhin hman aiin ei leh inah pawh kan hnianghnar deuh vek tawh a, sa ei thlahlel vanga Krismas nghakhlel chu kan awm tawh a rinawm loh e. Zoram kohhran tam ber chuan kan sawi tawh angin kumin hian Krismas ruai kan theh dawn lo niin a lang a. Krismas ruaitheh hi sawisel pawl an lo awm fo tawh a, hmanlai angin sa pawh kan thlahlel tawh hlawm bawk loin a lang a, Covid 19 reh hnuah pawh Krismas ruaitheh tawh loh hi ching hlen daih ila, tih hi duhzawk tam tak an awm ngeiin ka ring.

Krismas hi loneimite awllen hun a lo ni tawh a, khawdang ramdanga lehkhazir leh sorkar hnathawkte lo haw khawm hun a ni bawk a, khawtlang a zalen a, rilru pawh a thawveng a, khawtlang kha a nuam em em mai thin a ni. Tunah chuan thingtlang khuaah meuh pawh kha Krismas ‘spirit’ kha hmuh tur a vang ta! Keini ho kha Zoram Krismas nawm vanglai nang pha chin ‘Last batch’ chu kan ni ta mai awm mang e, kan fate ho hi chu tunlai Mizoram khawvel Krismas hre pha chin ‘generation’ an ni tain a lang, keini ho, fifties leh early sixties-a piang ho kha Zoram khawvel Krismas nawm vanglai hre pha chin chu kan ni ta maiin ka hria. Krismas chhang den leh chhum te, ruai theh hma deuh a nula tlangvalin in tina chaw an han khawn a, ruaithehna hmun tura zem lian puia an han chhung khu vut vut mai thin te kha a Krismas em em hian keini ho kha chuan kan hre tlat nia. Ruaitheh azawnga hrisel lo ber chi changel hnah phaha hlui buatsaiha chaw leh sa kan han inzen tawm luih luih mai thin te, hmun awih deuh a, a thlanglam pang chan palh phei chuan thiante sa tui chawm thli lo luang zawng zawng kan lama a rawn luang thla nguah nguah mai thin leh ten miah loa kan lo bar fai vek zel mai thinte kha a hrisel lo hle tih hre mah ila, a Krismas tlat lawi si! Urlawk zan, Krismas zan kan tih ber mai te khan zaikhawm hi tlaivar ngei tura ngaih a ni a, naupangho pawh zaikhawm ve chiah lo mah ila, zaikhawmna kawtah meilum aiin kan lo pawngsen tlaivar ve hrim hrim zel a, kha kha a Krismas-na chu a ni leh bawk. Khatih lai hun kha chuan nula tlangvalte pawh an zaikhawm a, interek tih lam kha a la lar lutuk lo bawk a, zaikhawmnaah tui taka Krismas hla sain mitthlaah Bethlehem dai an fang a. Tunah erawh mitthla ni loin a takin kan khawpui dai kan fang tawh thung hlawm a!! Heng Krismas ti hlimawma ti Krismas-tu ka han sawi te hi kan lo changkan tawh hnu hi chuan kan hre tawh ngai lo a ni ber a, Covid 19 a rawn inlar hnu phei chuan a eng Krismas boruak mah hi kan tem dawn ta lo chu a ni a le!!

Hmanah chuan Krismas kha kan nghakhlel ngawih ngawih a, a liam leh mai tur te kha kan ui ngawih ngawih a, a zawh chuan ni 365 zet nghah leh a ngai dawn tih kha kan hre chiang ve em em a, chu pawh dam rei nghah thil a la ni leh nghal. Roliana Ralte chuan a Krismas hla lar ‘A Lo Her Chhuak Leh Dawn Ta’ tihah chuan lungrun em emin ‘Hmanah chuan lenrual duhte nen, fakhla saa tlaikhua varin, hlimni ral tur ui em em in, Lal lo piang hlimte’n kan lawm,’ tiin khang hun lai Krismas hlutzia leh thlakhlelhawmzia a tarlang chiang khawp mai. Nia, he hun lawmawm hi ui leh am em emin kan hmang a, ui em em mah ila, kan chelh din rual lah ni si lo, tichuan kan hmang dawn chauh emaw kan tih laiin a liam leh ta vuah vuah mai thin si a, a lo thlen leh hun chu damrei nghah thil a lo ni leh ta mai si. The Shadows ho hla lar zet ‘Mary Anne’ hla thu min ti hre chhuak: ‘How slow the moments go, but how fast they fly, the next time I see Mary Anne’ tih hi. A bialnu Mary Anne a hmuh chak em em kha a han hmu ta cheng a, hun kha kal chak a ti leh ta lutuk si a, hetiang chiah hian Krismas pawh hi kan nghakhlel em em thin a, mahse a lo thleng a, a liam chawpchilh a ni leh mai si a! Kumin Krismas pawh hi kan dam chuan, Covid 19 karah pawh, tun atanga ni rei lo teah a lo thleng dawn, a lo thleng anga a liam leh nghal mai dawn bawk. Kum dang angin hmang thei dawn lo mah ila, Krismas hrim hrim hi a va han uihawm lawk em! Chuvangin Krismas hi a ni tak ai chuan a thlen dawn lai vel hi a nawm lai ber chu a ni zawk, chu chu hre rengin ren leh thiam takin kumin Krismas chu nausen chibai buk nan urhsun takin i hmang ang u aw.

Mizo Kristiante hi chu kan vannei e. Krismas hi Biak inah Pathian fak nan kohhran ten kan hmang a, hlim takin sapho Krismas hla leh kan Zo hla phuah thiamte Krismas hla, thlarau atanga an phuah chhuah ngei chu sain kan thlarau nun kan chawm a, kan nihlawh a ni. Sapho te hi chuan Krismas hi sumdawn nan an hmang tawh a, festival chikhat ang lekin an hmang ta hi a ni ber a. An Krismas hla thenkhatte lah hi ‘Ka Krismas card kha i lo hmu em?’ tih te, ‘Nikum Krismas khan ka hmangaih che i ti a, a tuk lawkah thenna thu min hlan leh si,’ tih te, ‘I tel lo chuan Krismas khawhar ka hmang a nih hi,’ tih ang vel duang mai mai kha an tleipui em em mai a nih hi. Mizo Kristiante chu heti zawng pawh hian kan vannei e. Mahse kum zabi tharah meuh chuan kan Zo Krismas hlate pawh a thlarau lo sawt ve ta khawp mai, kan local TV channel-ah kan hmuh ve nual tawh hlawm hi.

Krismas hla album hial lo siam tawh zaithiamte hi an vannei ngawt thung mai. Krismas apiangin an lar thar ziah hi a ni ber a. Jim Reeves Krismas album te hi a thar reng mai a nih hi, Krismas kan hman chhung chu kan play reng tawh dawn a ni. Chutiang bawkin Mizo zaithiamte zingah pawh Lalsangzuali Sailo te, T.Lalengzauva te leh Lalruotmawi te, Siampuii Sailo te pawh Mizote zingah chuan Krismas apiangin an lar thar leh ziah thin a ni ber. Album siam lem lo pawh Krismas hla lo ‘hit’ tawhtu Roliana Ralte pawh a taksa kan zingah awm tawh lo mah se a Krismas hla ropui, a hmaa kan sawi tak, ‘A Lo Her Chhuak Leh Dawn Ta’ tih hmangin kumtin Krismas lai chuan amah ngei leh he hla satute chuan min la awi zel dawn. Chutiang bawkin Krismas hla ‘hit’dang neitute pawhin mi hriat an rawn hlawh thar leh thin a nih hi. Eng ang pawhin Covid 19 chu hrang mah se, kum dang angin hmang thei loin Krismas hla sain zaikhawm thei loin Krismas ruai pawh theh ho thei loin kohhran ho inhmu khawm thei lo mah ila, Krismas hla tha tak tak kan neih te ngaithlain Krismas hlain kumin chu inpawlho mai ang u aw.

KRISMAS CHIBAI.

Read More>> Full>> Epaper Subscribe Now

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy