Lunglei Municipal Council inthlan neih turah political party tinten a mal theuha an chuh dawn avangin an party candidate-te an tlin ngei a beisei a, an tha ber tih MNF vice president Lalthlengliana chuan a sawi.
Ningani khan MNF party Lunglei Municipal Council (LMC) inthlan neih tura an party official candidate hi Lalthlengliana hian an puang a. LMC-ah party pathumten a mal theuha an chuh dawn avangin ruling party candidate-te an tlin ngei a beisei a, ward tinah MNF candidate an tha ber tih a sawi.
Congress chu hlauhthawnawm an awm lo nia sawiin, ZPM chu a phawvuak chauha thawm lian, a tak tih tham awm lo, ‘thawh hma leh phun hma, men rei leh phun rei’ thin an ni tih a sawi. “Kum 2023 hi Lunglei history-a dai tawh ngai lo tur, thangtharte tan chhinchhiah tlak tak a ni dawn a, chutah a hmasa ber atana candidate turte in nih avangin in tlin ngei a ngai. Kan candidate-te hian kiltin atangin beih in la tawk dawn chauh a, lo zam suh u. MNF chu party lian, nghet leh tlo, Diamond Jubilee pawh lawm tawh kan ni,” a ti.
MNF adviser, minister Dr R Lalthangliana chuan LMC chu Lunglei mipui tana rotling, malsawmna leh development tinreng kengtu tur niin, ro phum ruk haichhuahna tur a ni tih a sawi. MNF candidate thehchhuahte chu Lunglei tana mithiam leh tha thlankhawm, kohhran leh khawtlang tana mi tangkai, party dang tan pawh zam phah rum rumna tur an ni tih a sawi. LMC hringtu leh dintu MNF LMC candidate-te an thlantlin chuan Lunglei khawpuiin a tangkai pui hle tur thu a sawi bawk.
A mal theuha chuh chuan kan tlin kan beisei – MNF vice president
