Bayern Munich a zawm fel hlawt a, darkar 24 pawh a liam hman lo tihah Harry Kane chuan a club thar tan bul tan nghalin, Inrinni German Super Cup-ah RB Leipzig hneh loin a team thar a tlawmpui nghal!
German football season thar khuhhawnna inkhelah league champion Bayern leh German Cup champion Leipzig intumin, Eng-land captain Harry Kane hian a Munich debut-ah goal a thun zo lo ni satliah mai loin a team thar chu sithum faiin an chak lo!
Inrinni mai khan English forward hi Bavarians chuan Totten-ham atangin pound maktaduai 86-in an senglut fel hlawt a, Inrinni zan inkhel minute 64-a khelmual a luh laiin Allianz Arena mipuiin thawm ring tak chhuahin an striker thar an lawm a, mahse, Kane a chefuh nghal zo lo a, vawithum chiah ball tawkfuhin, a club thar tan hnem-hnanna a nei zo nghal mai rih lo.
Leipzig chakna goal thum hi Dani Olmo ‘hat-trick’ niin, he goal thum hian kum 30 mi Kane-a career-a a trophy hmasaber tur a dangchat leh ta rih!
Olmo goal hmahruai hi Bayern tlarhnung lamin cross ball an thenfai zawh loh hrinchhuah niin, a goal hnihna erawh a pui ta hle a, Matthijs de Ligt chingphar chungin Sven Ulreich-a kapkarah a thun.
Mualneitu team goal thum chhuah hun hi Kane luh hnu niin, Spain forward hian penalty chhuih-lutin a lungthu kimna’n a thun.
Inkhelh banah Bayern mana-ger Thomas Tuchel chuan season thar atana inbuatsaihna chawlhkar li chhung khan eng mah ti lo ang mai an nih thu a sawi a, an chak loh dan kha hrilhfiah ngaihna pawh awm lo a nih thu sawiin, department tinah beisei an pha lo fai vek a, a chhan awm-ang reng reng a hriat loh thu leh result chhe tak a nih thu a sawi.
England-ah goal hmaa ven ngai berte zinga mi ni mah se Germany rama a bultanna inkhelah erawh Kane a chefuh nghal mai lo a, kumin nipui insuan hun laia Premier League lama an player pawimawh pathum ngawt hloh hlimhlawt Leipzig an khel tha ve bawk a ni.
Leipzig chhuahsan zingah Croatia defender Josko Gvardiol chu Manchester City-in pound maktaduai 77-in an chhuhsak a; Hungary midfielder Dominik Szo-boszlai chuan pound maktaduai 60-in Liverpool a pansan a; France striker Christopher Nkunku chu Chelsea lamin pound maktaduai 52-in an chhuh ve bawk.
Tarlan tawh thin angin, German Super Cup hi England rama an season khuhhawnna inkhel Community Shield ang khu niin, Bundesliga champion (Bayern) leh German Cup winner (Leipzig) inbeihna a ni.
Season liamta German Super Cup-ah pawh khan team pahnih bawk hi intumin, Leipzig lakah 5-3-in Bayern an chak a, kumin chu result a letling ta a ni.
Harry Kane hi Bundesliga champion Bayern Munich chuan Premier League club Tottenham Hotspur atangin kum li chhung atan an lei a, German champion tan hian kum 2027 thleng a khel phawt dawn a ni.
A tir lamah Kane an leina man hi media thenkhat tarlan angin pound maktaduai 86 ti bawk mah ila club pahnih hian official-in he transfer fee hi an puangzar lo a, media report tam zawkah chuan euro maktaduai 100 (USD 109 million) nia tarlan a ni a, chu chu a dik a nih chuan Bundesliga record thar niin, kum 2019-a Bayern vekin Lucas Hernandez man atana Atletico Madrid hnena euro maktaduai 80 an chhunluh kha a khum hneh viau dawn a ni.
Bavarians thuchhuah chuan June 30, 2027 thleng an kianga khel tura England striker an sengluh thu leh number nine shirt a hak tur thu an puang a, chu thuam inbel chung chuan Inrinni zanah a club thar tan a inlan nghal a ni.
Kane hian mipa naupang kum 11 mi lek a nih laiin Tottenham academy a zawm a; kum 2011 khan a senior debut nghak-chhuakin, loan-in Leyton Orient, Millwall, Norwich City leh Leicester City lamah a chhuak tih loh chu a career pumpui tih theih deuh thaw London club-ah hian a hmang.
Englishman Kane khan a career-ah goal 354 ngah tling tawhin, Spurs tana game 43o chuang a khelhah goal 280 a thun a, Spurs player awm tawh zinga goal thun tam ber a ni mek. England tan pawh match 84-ah goal 58 a puitlin tawh a, Three Lions tana goal khung hnem ber a ni mek.
Premier League lamah pawh goal thun hnem ber dawttu niin goal 213 a khawl tling a, goal 47-in hmahruaitu Alan Shearer a pha lo.
North London club-a a khawsak chhung khan kum 15 chhung tehreng eng trophy mah hawn zo tawh lo Tottenham trophy khaw-kheng a tihtawppui zo lo a; kum 2019 khan Champions League final luhpuiin a chakpui zo lo a; kum 2015 leh 2021 khan a career-a title lak theihna hun tha bawhpelh bawkin League Cup-ah runners-up medal ve ve a awrh.
Kum 2021 khan Tottenham atanga chhuah a duh niin thu a thang a, khatih lai khan Man-chester City nen sawizawm niin, tunah, a contract neih laia kum khat hmabak la nei chungin Germany lam a pan ta zawk a ni.
Bayern hian kartawp Zirtawpni hian Bundesliga season bul an tannaah Werder Bremen an tum dawn a, goal hmaa an thiampuipa ni reng thin Robert Lewandowski kalbo hnuah tlarhma lama an buai ruk rengna sutkianpui tura an sengluh Kane tan insiamremna hun la awm tura beisei a ni!
A Munich debut-a chak zo lo Kane
