ender ropui Sergio Ramos chuan goal thun chungin a Paris St-Germain hun hnuhnung a thlahliam a, khawvela goal khungtu ropui Lionel Messi chuan Inrinni zana a PSG match hnuhnung berah goal a khung zo lo ni mai loin a team kalsan tur chu mikhual Clermont lakah 2-3-in a tlawmpui.
Messi leh Ramos hian Ligue 1 champion tana an game hnuhnungber chu season tawp niah khel ve vein, Real Madrid defender hlui Ramos hian minute 16-na lekah Vitinha cross atangin mualneitu team hmahruaina goal a tauhlut a; minute 21-ah Kylian Mbappe chuan penalty atangin sihnih faia PSG hmahruaina a chhuihlut ve leh.
Table laihawl luahtu Clermont beilet hian Mbappe goal luh atanga tuibur hmuam da velah an siphurh pakhat sut nghalin, Marco Verratti tihsual nangfuhin Johan Gastien chuan mikhual beiseina hmahruai a siamsak.
Chawlhlawk dawn hun pekbelh minute khatna a kal mek laiin Mehdi Zeffane chuan Clermont siphurh sut zawhna goal thawh zui ve lehin, second half tir lam minute 63-ah Grejohn Kyei chuan mikhual hmaruailetna leh an chakna goal ni zui ta a thun a; Kyei hian goal khat dang khung bawkin, chu erawh video assistant referee-in a hnawlsak a, penalty thelh lehin, chakna goal erawh a hlah duh ta lo!
Barcelona forward hlui Messi khelmual lut tur chu kick-off hma chiahin Paris mipuiin an ‘boo’ khum leh hluah hluah a; inkhel an tan a, PSG tana game 75 a khelh tlinnaah goal 32 a thun tawh belhchhah turin ‘chance’ hmu nual mah se a hlawhchham fai vek!
Argentine superstar hi ex-Real Madrid defender Ramos ang bawka tun nipui thawt ruala a Paris contract hmang z tur niin, inremna thar ziak loa a chhuah tur thu nemngheh a nih hnuah a club hlui Barcelona lamin hruaikir leh dan kawng dap mek bawk mah se tun dinhmunah Saudi Arabia club lian Al Hilal leh Major League Soccer club Inter Miami-te chu a kalna tura awmkhan ber an ni rih.
Parc des Princes inkhelah khan a hma kar chiaha La Liga title an lak tuka an ram Spain lama sakawr chunga a chuan laia chesual goalkeeper Sergio Rico damleh thuai theihna’na duhsakna hlanin PSG player-te’n an kawr hnunga Sergio Rico hming inziahna jersey an ha vek a, an squad number theuh an nemkai thung. Rico hi an ram damdawi in lamah enkawl mek a ni.
Inkhel tan hmain fans lamin an keeper duhsakna banner an tarchhuak a, tan atanga minute rukna (Rico squad number) chiahah mipuiin an goal-veng hliampui tuar tan kut beng chungin thawm ring tak an chhuah ve bawk.
Clermont laka a goal thun hmangin Mbappe chuan a zawna a tum ngana ni turin Ligue 1 Golden Boot a dawng a, France rama top scorer vawinga ni thei palina niin, Carlos Bianchi, Delio Onnis leh Jean-Pierre Papin-te record a nihrualpui.
He France striker hian league goal 29 nen French Ligue 1 season a khat a, Nice khelmuala 1-3 Lyon tlawm tuma goal khung zo ve ta lo Lyon player Alexandre Lacazette chu Mbappe hnaih bertu niin, Ligue 1 goal khung tam pahnih hi goal hnihin an inthlau.
Inrinni inkhel danga an mikhual Lens laka sithum faia tlawm Auxerre chu division hniam lamah an tla ta nge nge a; a hniam pali zinga tel chunga khelmual lut Nantes chuan Ignatius Ganago goal khat thun hmanga Angers hnehin ‘tlak’ an pumpelh hram.
Brest khelmuala 2-1 hnehna chan manah Rennes chuan Lille hmakhalhin palina an luah a, season tharah Europa League an khel thei dawn. Troyes muala 1-1 draw bak pel zo lo Lille hian Conference League lam an hawi a ngai dawn ta a ni.
Toulouse laka 1-2-a an tlawm tuarin Monaco pawhin season tharah Europe club inelna lian an chuangkai zo dawn lo a; last minute-a an tlawmna goal khungtu hi Cardiff leh MK Dons striker hlui Rhys Healey a ni.
A Paris hun tawpnaah Messi chak zo lo
