A portfolio niloa CM inrawlh vangin minister an mangang – Lal Thanzara

A portfolio niloa CM inrawlh
vangin minister an mangang
– Lal Thanzara
Portfolio nei ve lo tura insawi siin chief minister chu a portfolio ni loah pawh a thu ber a, a thu lo chuan hna a pek theih avangin minister an mangang hle tih Congress hruaitu Lal Thanzara chuan a sawi.
September 18-a Congress Bhavan-a inkhawmah MPCC president Lal Thanzara chuan, CM portfolio nei ve lo tura insawiin a nei hnem ber a, a portfolio chan nia lang lo PWD, UD&PA ah pawh a thu ber a, a thu lo chuan hna a pek theih loh a. Heng department hnuaia minister-te an mangang hle niin an lo hria tih a sawi.
Tunlaiin Zoram hmun tinah kawngpui chauh ni lo, fehkawng thlengin tuilet hnua kawng chhiat ber tum kan tawng mek niin a sawi a. Central-in sum siamna atana an hman NHIDCL-in kawng an siam a, a mam pur a, kum 15 daih chu khawilamah, furkhat pawh a daih lo tih a sawi bawk.
ZPM sawrkar chu a sumdawng emaw tih mai turin, Congress-in an lo din medical college chu enkawl huphurhin hralh an tum a. Mah se, centre-in tuamhlawm a lo tiam avangin an la enkawl hram hram tih a sawi. Hydel project pasarih aia tam an hralh tawh thu, Chaltlanga Tourist Lodge pawh mihausa hnenah min hralhsak nia a hriat thu, Lengpui Airport bul ram an hralh bawk thu sawiin, hralh tur an zawng reng mai tih a sawi.
“Kan ram rohlu an hralh atang pawh hian kum 30 chhungin sawrkar hmasaten engmah tih an nei lo, tia an au dum dum thin chu a dikloh zia a langchiang a, sawrkar hmasa hmalak tawhte hralh tur an zawng char char mai a ni,” Lal Thanzara hian a ti.
Central-a Congress sawrkar lai, kum 2005 khan mipui leh sawrkar langtlang taka an indawrna atan, corruption venna atan, tiin Right to Information Act an siam a, chu chu tuna ZPM sawrkar hian a pawngsual tih a sawi. “Mipuiin an thil hriat duh an zawt a, RTI zawhna reng reng a chhanna tur a concern minister hriatpui hmasakte a ngai. Chumai bakah an chhang tha duh loa, chhan duh loh pawh an nei a ni awm e. Corruption dah bona atana tih chu, hliahkhuhna atan sawrkar hian a hmang mek a. RTI chhanna pek duh loh vanga High Court-a sawrkar a zualko hi tunhmain kan hre ngai lo,” a ti.
Pathian leh mipui zarah Congress a sawrkar leh anga, corruption awm lo, kuthnathawktute thlai hralh leh sawngbawlna an ngaipawimawh dawn, tiin, thalaite eizawnna turah theihtawpin hma an la dawn tih a sawi a ni.