A pumhluma FCAA pawm
hi a pawi zia kan hmu dawn
– TJ Lalnuntluanga
FCAA 2023 ah India sawrkarin guideline a thun tel a, guideline hi siamthat a awl avangin, he dan hi a pumhluma lo pawm ve kan ram tan a him lo lehzual a, a pawi zia kan la hmu chho dawn chauh tih MNF hruaitu TJ Lalnuntluanga chuan a sawi.
Thawhtannia Mizo Hnam Run-a inkhawmah MNF general secretary TJ Lalnuntluanga chuan, FCAA hi MNF sawrkar tan tirh, thla 2019 March 7 khan sawrkar laipuiin PCCF Mizoram kaltlangin ‘Indian Forest Act 1927’ siam danglam tum a nih thu leh chumi chungchanga Mizoram sawrkar ngaihdan chu ni 90 chhunga hrilh tura tih an ni tih a sawi.
Dan siamthat tur hi tehna chi hnih hmangin an lo teh nghal tih a sawi a. Ramngaw, nungcha leh sik leh sa inthlak danglam zel tur venthat leh, kan lui tuihna kiam zel tur venhim kawngah dan thar hian tihdal emaw tihbahlah a a awm thei em, tih thlengin official-te nen zirchian a ni tih a sawi.
“Mizoramah Forest Act hi kum 1955 ah kan nei a, khatihlai khan state thuneihna hnuai (state list) ah dah a ni. Kum 1976 a India danpui siamthat a nih khan, centre leh state thuneihna intawm (concurrent list) ah dah a ni leh a. Central-in forest dan siamthat tum lehnaah khan India ram pumpui central thuneihna (union list) ah dah tumna ni ah kan ngai. Kan ngaihpawimawh ber chu he dan siamthat tum hian Article 371G a kalh em, tih a ni a. Kan zirchianna zawng zawngah a kalh vek a, khatihlaia CM Pu Zoramthanga thurawm angin, NGO leh party hruaitute kan rawn a, kan zavaia duhdan ang leh Mizoram Assembly duhdan angin kan duhloh thu kan thawn ta a ni,” a ti.
Sawrkar anga an tih theihchin a tawp hnuah, mipuia zualko an duhlaiin inthlanin a nangching ta a, he dan hi a guideline zirchian tha tiin, engmah guideline a la awmloh avangin an sawrkarin a tlaksan ta tih a sawi a ni.
2023 December 29 khan a dan a lo chhuak leh a, kan ram khawilaiah pawh, ramri atanga km. 100 huamchhungah kan awm vek a, chu chuan kan ram tihchhiatna tur kawng zau tak a inhawng dawn a, ram tihchhiatna turin clearance ngai tawhloin central-in a duhna lai lai a hmang thei tawh dawn tih Law minister hlui TJ Lalnuntluanga hian a sawi bawk.
“FCAA hi theihtawp chhuahin MNF-in a do a, central lamin state sawrkar sihhnipna hmuin an rawn tilui tang tang a, tunah hian project engemawzat kalpui an tum a, ZPM sawrkar chuan Assembly House-ah an lo surrender ta ni. He danah hian a guideline an thun tel a, guideline hi siamthat a awl em em a, he dan hi kan ram tan a him lo lehzual a ni,” a ti.
Ram leh hnam humhimna tur a nih vangin ZPM sawrkarin he dan a pawm tawh hi a hnuhlet leh ngei theihnan mipui tanrual a ngai tih a sawi a ni.
A pumhluma FCAA pawm hi a pawi zia kan hmu dawn – TJ Lalnuntluanga
