Vaivakawn khawtlang tangrual nena tangduna Excise & Narcotics department-in ruihtheih thil dona kawnga hma an lakna pakhatah, Zohnuai huamchhunga ‘a senchi lane’ bikah chuan rah a chhuah nia an ngaih thu Excise department lam hian an sawi.
Kumin June 8 khan Aizawl West II bialtu MLA, Excise & Narcotics minister ni bawk Lalnghinglova Hmar hoin Vaivakawn khawtlang leh Excise & Narcotics department (END) tangdun chuan Vaivakawn Zohnuai huamchhunga ‘a senchi lane’ an tih mai thina beihpui an thlak mek chuan rah duhawm chhuahin helai hmun hi a reh rih hle tih END hotute chuan an sawi a. Zu hralh leh lei tum an awm loa, a theih anga he beihpui hi chhunzawm zel tum a ni tih an sawi.
END chuan kuminah, June 21 thleng khan rakzu (local) litre 31715 an man tawh a, zu bilh lai tin 58198, India-a siam a senchi (IMFL) um puitling 8411, a chanve um 1232 leh a quarter (180 ml) 3204 an man tawh. Ramdang siam chu (FML) litre khat bur 45 leh ml 700 um 101, Burma local – BEDC litre 1278.800 an man tawh bawk. Ramdang siam zu hi Burma lam atanga lakluh a ni tlangpui.
Zu vanga dan bawhchhetu man zingah hian vantlang hmuna zurui leh midang tana buaina siam, court-in thiamloh a chantir thenkhat chu Section 6(2) & (3) of The Mizoram Liquor (Prohibition) Act, 2019 tlawhchhanin Excise & Narcotics venhimna hnuaiah vantlang hna thawhtir thin an ni tih an sawi a ni.
‘A senchi lane’ a zia rihah ngai
