Daily Newspaper

A tawp kharna hnehtu Verstappen

14

2020 Formula One season hmawrbawkna chu Pathianni khan Abu Dhabi-ah tlan zoin, Red Bull khalhtu Max Versta-ppen chuan Abu Dhabi Grand Prix hnehna nen season a khar a, a hnung chiahah Mercedes driver pahnih Mercedes pair Valtteri Bottas leh Lewis Hamilton an indawt.

Dutchman Verstappen chuan mittlung taka intlansiak thunun chungin hnehna nen kum a khar thei a, intlansiak zawhah a huntawn hlimawm a tih thu sawi chungin an team chet lak zawng zawng a fuh fai vek tih a tarlang tel.

Verstappen tan tun kha a career-a F1 race vawi 10 a chak tlinna chiah niin, kumin bika a vawihnihna a ni a, overall standing-ah pathumna luahin, a chungah Bottas leh Hamilton an indawt chho ve thung.

A zawna title pasarih la thei Mercedes khan season kharna thlaler intlansiakah Verstappen-a Honda-powered car an um pha lo hle a, Abu Dhabi tlankawnga kumruk chak zawn tawh Mercedes-in tuntum chu Yas Marina Circuit-ah ngam loh an tawng ta tlat a, hripui hneha tlankawnga kirleh world champion Hamilton meuh pawh lawmman semna dawhsan chung berah a lawn zo lo.

Verstappen-a hnehna hian tun season-a Hamilton-a vawi 12 chak tling tur a dang chiah chiah a, chuti chu ni lo se kumin hi race chak tam lama a hlawhtlinber kum a ni thei dawn a, ti hi chuan season khata race vawi 11 aia tam chak tlin a nei lo chhunzawm zel tihna a ni.

Kum 35 mi Briton hi Bahrain intlansiak hmasa zawka a chak hnuah hripui a kai tih hmuhchhuah a nih hnuin a inkhung vang vang a, Bahrain race vawihnihnaah a inlan thei lo a, season kharnaah erawh car a khalhchhuak thei ta hram a, Covid-19 test-ah negative tawh mah se a huntawn khan a la nghawng deuhte pawh a nih hmel a, intlansiak zawhah Abu Dhabi race kha taksa lama intlansiak hautak a nih thu sawiin, a tlan dan leh thlen chinah erawh a hlim tho tho tih a tarlang tel.

Kuminah hripui avangin grand prix thenkhat thulh a ni a, thlanga leh a chanve chhungin intlanziak vawi 17 an zo hman hram a, race vawi 11-a hneha chang Hamilton chu world champion niin, vawihnih ve ve chak Valtteri Bottas leh Max Verstappen-te’n an dawt.

Constructors championship lamah point 573 hmuin Mercedes an sangber a, Red Bull (319) leh McLaren (202)-te’n a indawtin Mercedes hnung an dawl.

Hripuiin kum 2020 season a tihkhaihlak avangin Formula team leh driver-te’n season chawlh rei lo zawk an hman a ngai dawn a, kumthar February thla tawp lamah hi chuan pre-season test tura an chhuahkhawm leh a ngai dawn a, factory lamah car tuaithar tura an buai chhoh zui a ngai ang.

Season thar hi nakum, 2021 March thla laihawl khian Melbourne khuaa tan tura ruahman niin, kan hripui laka invennain a nih tur anga hna a thawh loh chuan kumthara Formula One world championship kal dan tur hi sawilawk theih a ni lo ang.

Read More>> Full>> Epaper Subscribe Now

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy