A tawp nan vawikhat leh chiah city bus leh bawk aw-An mak |ang |ang teh a nia

K. Hmingthankaia
Thil tangkai em em mai, mahse, hnawksakna lai awm deuh tlat bawk si, Aizawl tlangdung kawngpui dunga thil lianpui mai nitina veivak nileng leh, khawimaw lai hmun luah nileng zak tlat si thin city bus-te hi, tun aia tangkai zawk leh hnawksak lo zawk deuhva tih dan awm theih dan tur hi kei leh Vanglaini leh Aizawl Post Editor-te tih loh hi chuan an vei ve lo emaw ni, mi hi an ngawi ang thuap lawi si a. Chuvangin, a veitu leh sawitu nih bik pawh hi a zahthlakin a inthlahrunawm lek lek tawh zawk a nih hi. City bus hian sawrkar leh keini a veitute hi min tlawm ti tih ta chu a ni ta deuh berin ka hre ta a ni. Chuvangin, tun tumah hi chuan thil dang tam tak chu sawi tawh lovin, sawrkar leh department lam pawh demna leh che tura phutna lam pawh sawi em em tawh lovin, thil engemaw mai mai leh, city bus enkawltute kawchhunga Tulum lut niawm tak vel hi sawi mai mai tawh zawk ang aw.
Passenger chhuk leh lawn chhung bak chu city bus te an stand-ah din phal loh tih thupek hi city bus permit petu leh thu neitu sawrkar hian vawihnih, kum 2025 August thlaah leh 2026 May thlaah an puang tawh. 2025 September ni 1 atanga hman tan tur tih chu a hman tan ni, September ni 1 ni na na na chu an zawm tha hlawm khawp mai. Mahse, ni 1 bak chu tumahin an zawm leh ta chuang lo a ni. Tichuan, kum 2026 May thlaa thupek an chhuah nawn leha June ni 1 atanga hman tan tur tih erawh chuan ni khat pawh ngaihpawimawh a hlawh ta lo niin a lang. Kei pawhin June ni 2-ah chuan city bus-ah thui tak chu ka chuang ve a, thil awmdan chu ka hmu ve a ni.
Tichuan, thil awmdan chu chanchinbu thenkhat ah dengkhawng deuh takin ka chhuah ta a. Tin, June ni 7 sunday chuan social media-ah ka vawrh darh chiam bawk.
Tichuan le, social media-a a darh tuk, June ni 8 thawhtanni chuan sawrkar chuan nasa takin tan a la ta ngei mai a. Hemi ni June ni 8 ni, nikhat chauh na na na hi chu sawrkar chu tang tak a ni. Bus ho pawhin thu an awih nangiang mai. Anmahni zawkin passenger-te chu an tur ta vat vat mai a, an tlan leh ta zung zung mai a ni. Hemi ni na na na hi chu nuam ve tak chu a ni.
Hemi ni, June ni 8 ni hian kei pawh Aizawl Hospitala ka kal zo chu Khatla kawnah bus ka chang a, Ramhlun lam kal tur a lo kal lawk loh avangin ka awm ve deuh reng a ni. Bus dang lo thleng ho chu an rang tha thei vat vat khawp mai. Mi ram te pawh kan ang ve deuh rum rumin ka hre hial a ni.
City bus ka channa Khatla stand-ah chuan traffic police ho pawhin an mit an len viauin ka hria a. Transport department Enforcement staff 2 pawh form hain an lo awm ve a. ‘Enge in tih? ka ti a. “City bus thu awihlo awm leh awm loh kan duty” an ti. Eng eng emaw kan sawi hova, anni chuan, “Mipui pawh hian tan la ve se la, bus ding rei reng reng chu, e khai, kal rawh kal rawh, lo ti ve zel se tha tur a ni a. Keini’n kan hmu vek seng si lova” an ti a ni. A dik lutuk. Mahse maw, sawrkar ber hian bus ho hi a la hlau deuh tlat nia hriatna a awm avang hian mipui lam hian kan la ti vak ngam lutuk hrih lo niin a la hriat rih a ni. Sawrkar lam a khauh viau hunah leh sawrkarin mipui a chhan ngam dawn nia kan hriat hunah chuan kan ti sup sup tawh mai ang. Tichuan, anni chuan, “Treasury lam kan va en thlithlai leh ange” tiin an kal ta a.
Hemi ni hian Bawngkawn thleng ka kal a, ka let leh a ni. Bawngkawn-Durtlang pengthuam mihring leh motor rush em emna, sawlai hmun buaithlak tak kara bus lianpui nilenga lo ding nitin ve ziah thin kha a han awm ta lo chu a thawventhlak huai mai a. Mihring leh motor che vel traffic pawh chu a ziaawm phah hmel hlein a hriat a ni. Ka rilruin, aw hman hman atang tawh khan hetiang hian lo ti daih tawh ni ila tha tur hi a ni a le..hetiang hian han ti reng thei ila aw..mahse, rei kha kan daih leh awm si lova, ka ti rilru vawng vawng a ni.
Tichuan, ka lo let leh lam chu power house-ah ka chhuk a, ka chuanna bus chu ka enthla zui ru deuhva, hetah hi chuan a ding rei leh ta fu mai a. A hnu zelah pawh helai stand hi din rei nan an hmang zui ta zel a, vawikhat phei chu traffic office lam ka han hrilh nghe nghe a ni. Tichuan, ka chho zela, Israel point-ah chuan mihring tam tak veivak insulpel suau suau vel thin tibuai tura ni danga bus lianpui pui lo intlar pet put thin kha rinloh tak maia lo awm ta hauh lo mai chu nuam tak a ni. Tichuan, Civil hospital stand lamah chho lehin, ni danga englai pawha bus lianpui lo din hnawk ve ruau nilenna thin, Thana pengthuam lun lai pawh chu a lo thawveng ta huai mai a. Mihring leh motor che vel pawh chuan ni dang ai chuan nuam hi an lo tih hmel ta hlein ka hria a ni. Helai kawngsira thil zuar ho hnenah chuan, ‘Bus-in nilenga a din hliah tlat tak loh che u hi nuam in ti em? ka ti a. Anni chuan, “Nuam kan ti lutuk. A then phei chu bus tinung hluah hluah chungin rei tak tak an ding thin bawk si a, thawpikthlak thin tak a ni” an lo ti a.
Tichuan, kein ka phei zel a, hmun pawimawh lai tak Treasury stand-ah ber kher chuan bus pakhat chu rin loh takin a lo ding veng veng mai a. Vawiin ni na na na chu hmun dang zawng zawngah pawh bus hoin thu an awih ve hram hram tehlul nen, helai hmun pawimawh leh pengthuam lun lai tak, langsar lai tak ni bawk si ber khera a engtiziaa sawrkar thupek zawm duh lo ngam tlat nge maw chu ni le? tiin, mak ti deuhin ka en ta reng a. Transport enforcement staff chu ka hmu lova, traffic police chu an awm nual, mahse, an inngaihsak tawn lo. Tichuan, he hmun ka thlen hun chawhnu dar 2.40 atanga ka awm chhung, bus 7 te an innghah chhuah leh zat zat hnu chuan mak ti tak chung chuan ka haw ta a ni. In ka thlen hnu chuan traffic police office lam chu ka han phone ta a. ‘Vawiin hian treasury bus stand bikah hian bus ho hi din rei phal bik em ni? Hei, chawhnu dar 2.40 atanga ka awm chhungin bus 7 te chu an an la innghak chhuak leh ta zat zat mai si a’ ka ti a. Anni lam chuan, “Phal bik love, kan lo inhrilh ang e” an ti a. Engtinnge ni zel ta tih lam phei chu ka hre zui ta lem hlei lova.
Aw le, tuna he thu ka ziah hun hi June ni 22.2026 a ni. Vawiin ni thleng hian bus ho hian pick&drop system zawm hi an la hreh em em mai a. Stand-a a rei thei ang ber din hi an la tum tlat vek a ni. Vawiin pawh hian Khatla-Chanmari-Power house thleng ka chuang leh a ni. Stand tinah an mawnga inhnim chhuak pha lo deuh chiah chiah siin, mahse, hnunga mite lo lan rual rualin, meter tlemte chuahva inhlatin an kal chhuak chauh zel leh ta a ni. Hnunga mite an lo lan har leh an ding rei mai kha a la ni tho a nih chu. In ka thlen hnuin Transport department leh Traffic control room chu ka phone ve ve hrim hrim a. ‘City bus pick & drop system hman tur tih thupek kha a la ngai reng nge, hlih a ni leh ta? tiin ka zawt lui ve ngat a. Anni’n a la ngai reng an ti. Keiin, hei zawm a hlawh leh tawh mang si lova, hlih a ni leh ta mai emaw te ka ti a’ te ka ti ta vel mai mai a ni. Tu tute emaw leh khawimaw lai laiah chuan a chang changa zawm tha ve deuh hlek te chu an lo awm ve mahna, mahse, ka hmuh phak ho hi chuan sawrkar thupek pick&drop system hi chu zawm har hi an ti em em mai a, a theih dan dana bawhchhiat theih dan hi an zawng ngar ngar ni berin a hriat a ni. Pick & drop thupek awm tirh kha chuan Israel point-a ACBOA lam duty dah pawh hian bus dang lo lan hma khan a lo ham chhuak ve zat zat thin ni khan ka hriaa. Mahse, hei, hmannia ka hmuh leh kha chuan bus dang rawn din leh hnuah chauh a ham chhuak leh tawh niin ka hre leh tawh a ni. Hetiang te chuan khawilaimah chu thawveng a awm leh tawh lo tihna a nih chu.
Aw le, engpawh chu ni se, engtiziaa heti tak maia city bus enkawltute hian pick & drop system zawm hi an hreh em em tlat mai chu ni le tih hi ngaihtuah ngai chu a ni ta a ni. Bus neitu lam, ACBOA lam chuan pick & drop system hi an duh ve niawm tak khan sawrkar khan a sawi si a. Chuti a nih chuan city bus driver leh conductor tam tak hi, a neitu an nih loh avanga nikhat thilthua pawisa hmuh teuh an duh avang chauhva hetia mahni hmasial ta em em mai hi an ni ta mai ang em? Hmana ka ziah dan phei chuan, nikhat thilthua ban theih driver leh conductor-ten nikhat thilthua hlep ruk tur an duham vang mai mai ka ti nghe nghe a ni. Mahse, chu chu an haw khawp mai a, an office-ah min ko nghe nghe a ni. Aw le, chutia bus neitu lamin an duh bawk si chuan, driver leh conductor-te vangin kan hreawm zel ta tihna em ni dawn le? Nimahsela, bus driver leh conductor zingah hian a neitu dik takte pawh an awm ve teuh tho si a, enge maw thil awmdan chu ni ta ber ang le? Bus neitu lam pawh hian pick & drop hi an lo duh tak tak lo tihna em ni zawk le? Hmana ACBOA lamin ka hnena an sawi dan chuan, pick & drop hi anni pawhin an duh a, an driver leh conductor-te an thunun thei lova, chuvangin, a check-tu tur an ruai hial niin min hrilh a. Amaherawhchu, an pawisa dawn a rualkhai deuh theih nan, stand hlawk deuh tur thenkhatah erawh chuan ding rei turin an inti a ni awm e. Mahse, chu pawh chu kei chuan ngaihtuah chian ngai tak chu niin ka hria. Stand hlawk an tih lai apiang hi mipui leh lirthei insulpel tamna lai, an din reia an hnawksakna lai zel chu a nih zawk hmel si a.
Engpawh chu ni ta se, ACBOA lamin pick & drop hman an duh bawk si chuan, a lan danah chuan bus neitute duh dan, mipui duh dan, mipui tana tha tur leh mipui thawvenna tura sawrkar thupek zawm duhlotute chu city bus driver leh conductor-te chu an va nih hmel ta si ve. Chuti a nih chuan chu thil tih tawp dan tur chu bus neitu lam leh mipui lam leh sawrkar tangrual tan chuan thil harsa tak chu a va nih hmel si loh em. Mahse, vawiin thlengin city bus-te rei tak tak an stand-a an din leh an la innghahchhuah zat zat chu kan la ti tawp thei si lo hi enge a chhan ni ta ang le? Khawilaiah hian nge diklo leh chaklo chu awm ru tlat ni ta ang le? Tunah tak phei hi chuan stand hi ruak hman miah lo turin nitin bus service hi an tih tam belh deuh em ni chu aw? Chuti te a lo nih phei chuan an intam chhuah lehzual dawn awm si a, te ka lo ti deuh a ni. Mahse, chu erawh chu ka hre chiang chuang lo.
City bus ten stand-a din rei an duh chhan ber nia lang chu, chu stand khat atanga chuang tur mihring kha a tam thei ang ber, hnunga mite phurh tur ai zawng zawng lo nghah khawma, lo phurh khalh veka pawisa lo dawn khalh teuh bik chu an duh ber theuh nia lang hi han ngaihtuah mai pawh hian a atthlak em em mai a ni. Tin, sawrkar thupek zawm duh lo nih chu thuhran ni se, nitin service tawh lo tur, zanina an bus permit tawp mai tawh tur ang ziazanga khawsaka, mahni hmasial em em mai leh duham lutuk nih kha a zahthlak hrim hrim bawk. Chutiang chuan an vaiin stand tinah an ti theuh bawk si a, nitina service tur ni si tan chuan awmzia hi a va han awm lo tak em.
Han ngaihtuah mai pawh hian thuawih taka stand khata ding reng lova an vaia an tlan leh nghal zel mai hian an pawisa hmuh tur hi a tlem phah hi a rinawm loh a ni. A hmaa bus tlanin a phurh hman lohte kha ani’n a va phur ve leh mai anga, chutiang bawkin ani bus rawn nang hmanlote kha a hnunga miin a rawn phur ve leh mai dawn kha a ni si a. Khawimaw lai stand-ah chuan mi an lo tlem deuh tum emaw, an lo awm miah loh tum emaw a awm anga, khawimaw lai stand-ah emaw erawh chuan mi an lo tam viau tum a awm bawk mai dawn kha a ni si a. Chutia an vaia nitin an tlankual reng dawn avang chuan city bus ho hian an chan tur tawk average hi chu inang tlang takin nitin thlatin an hmu theuh mai dawn tho a ni. Eng ni emaw, nikhat hmuh chhiat deuh ni te chu a awm ngei anga, mahse, hmuh that deuh ni te pawh a lo awm ve leh dawn tho si a. Thlakhat income average chu a danglam vak chuangin a rinawm loh a ni. Chu chu lungawi tlang takin kan vai hian ngaiah kan neih thuai tawh mai dawn a ni.
Chumai a la ni lo, chutia city bus-te rintlak taka an tlan zar zar tawh dawn chuan, hmunkhat, stand khat chauha bus kan lo nghah chhung bak kha chu stand dangah hun kan paih tawh dawn loh avangin mi tam tak hian office leh khawilo kal vel nan bus kan hmang nasa lehzual tawh anga, tunhma aiin bus income pawh chu a lo sang sawt tawh dawn bawk a ni.
Aw le, nangni city bus enkawltu tangkai tak takte u, kawng kan neihchhun tlemte leh zim tak, rem lo tak leh chep tak ni bawk si hi tlem tala lo tih ziaawm phah ve deuh theihna, mipui lo tih thawven ve deuh theihna, mipui tana tangkai zawk nih lehzual theihna, kea kal leh motor dangte chet vel tih nawm phah ve deuh theihna, traffic jam tih ziaawm ve deuh theihna, khualzin laka city bus ding rei lutuk zahthlak tih rehna, chu’ng zawng zawng bakah kan tih tur dik tak sawrkar thupek zawmtu nih mai hi nangni city bus enkawltu zawng zawngte tan hian a harsa em em bik dawn em ni le..
In din rei avanga mipui leh lirthei dang tana in hnawksak zualna lai-Kulikawn, Khatla, Thana peng, Zarkawt, Chandmari khawilam ve ve pawh, Bawngkawn Durtlang pengthuam, Power house, Israel point leh Treasury stand tea in han din rei tak loh avanga mipui leh lirthei dangten nuam kan tih tawh ziate, thawventhlak kan tih tawh ziate hi min hriatpui ve ula, tin, in tlan zung zung tak avanga kan tih tur kan tih theih phah ta te hi kan lawm em em a sin.
Tin, city bus te nalh leh nalh lohte, an conduct dan leh an service dan system hrim hrim te pawh hi, chumi khawpui leh a mi chengte living standard tehna a ni tihte pawh hi hre tel tawh ila.
Chuti chuan, khi’ng a chunga kan sawite takte khi han ngaihtuah chiang vang vang la, i rilrua thil tha leh dik tih duh lohna leh sawrkar dan bawhchhiat theih dan phet tumna thlarau sual Tulum kha dah bovin, kan ram leh mipui hmakhua ngaiin, sawrkar thupek zawmtu tha leh khualehtui tha ni chungin stand-a ding reng tawh lovin i tlan leh nghal zel tawh ang u aw. I chan tawk tur a bo dawn chuang si lo a, kan vaia hlimna leh hmasawnna a lo ni dawn bawk si a.