Arsenal goalkeeper hlui Wojciech Szczesny chuan goal ven bansan tura thutlukna a siam zet hnuah Barcelona mamawh chhanna ni turin a kutkawr khaihul tawh a inthawlh leh dawn a, tun season la bang zawng Catalan giants tana khel turin inremna a ziak tih Nilaini khan La Liga club thuchhuahin a tarlang.
Thla khat liamta mai khan Polish keeper hian football khelh a bansan a, mahse, Barca first-choice goalkeeper Marc-Andre ter Stegen chuan thla hmasaa 5-1-a Villarreal an sawp tum khan a khup dinglamah hliam serious tak a tuar a, zai hial a tawh zui tak avangin tun season kal laiah chhawr theiha a dam hman a rinawm tak loh avangin goal-veng mamawh Nou Camp club hian free agent-in Szczesny chawl tawh chu an va kaichhuak leh ta rih a ni.
German keeper Ter Stegen a awm tak lohah chuan kum 25 mi Inaki Pena chu goal-a an rinrawl ber tur a ni chho lo thei ta lo a, Barcelona hian tawnhriat la nei tam lo Pena ngawr ngawra innghah chu him theiin an hre lo a ni chek ang chu kum 34 mi ni tawh Szczesny chu an squad thuamchak turin an senglut ta a ni.
Poland international hlui Szczesny hian Serie A club Juventus-a kum khat daih contract a la neih laiin August ni 27 mai khan a contract ding lai chu a titawp a, football khelh a bansan thu a puang zui a, mahse, thla khat lek hnuah Turin khuaa Italy great Gianluigi Buffon thlaktu ni pha ngat hian Spain leilungah goal ven hna a chhunzawm leh rih dawn a ni.
Juve tana game 250 chuang khela league leh domestic cup vawithum ve ve la tling Pole hian season liamta tawp ruala an sengluh thar Michele Di Gregorio kha a ngam ta tlat lo a, kum khat lai Turin khuaah la chambang thei mah se inkhel mang loa teihawi mai mai ai chuan a contract neih lai nuaibo a thlang ta zawk a, mahse, team lian zawk tih theih turah hmun a chang chho leh dawn si a nih hmel!
La Liga danah club-in thlali chuang chawlh ngai khawpa player inhliam a neih chuan transfer tukverh khar lai pawh ni se free agent-a player sengluh phalna dan an nei a, hei hi Catalan team-in an hmangtangkai ta a ni.
Khelh riata goal 21 hum chungin a club thar Barcelona hian La Liga standing-ah hma an hruai mek a; Pathianni league match-ah Hansi Flick-a team hian Deportivo Alaves an luhkhung ang.
Szczesny hian rawlthar kum 16 mi lek a nih laia a zawm Arsenal tan khan match 181 khel tlingin, north London club leh Juve bakah Brentford leh AS Roma thuam a inbel tawh bawk.
Kum 2017-ah Juventus a zawm a, Turin khuaa kum sarih a khawsak chhung khan game 252 khelin Serie A title leh Coppa Italia title pathum ve ve a lakpui hman.
Warsaw khuaa piang Szczesny hian Poland tan pawh game 84 khel tlingin, ram tan European Championship pali leh World Cup vawihnih a khel tling.
Juventus-a a contract neih lai titawpa football khelh a bansan thu a puan lai khan Szczesny chuan a taksa lamin chona eng pawh hmachhawn la inpeih bawk mah se a rilru erawh chuti lamah a awm hlawl tawh lo tih a sawi a, a chhungkaw tana a hun leh tha hman ve tawh a duh thu lo sawi tawh mah se Barcelona mamawh chhanna ni turin khelmualah a kirleh dawn a, Alaves lakah hian a debut a nghahchhuah rin a ni.
A club thar Barcelona hi karliamta Inrinni khan Osasuna chuan 4-2 tehrengin an hneh a, kha kha league season kal laia an vawikhat tlawmna niin, La Liga game riat an khelh tawhah vawisarih an chak.
Tunkar Thawhlehni khan Champions League lamah an bultanna inkhela an tlawmna chhangletin Hansi Flick-a team hian singa faiin Young Boys an sawp.
A thutlukna suta kutkawr bun tha leh Szczesny
